之前我哋都報導過，日本遊戲公司 Natsume（ナツメアタリ）發表一代經典遊戲《奇奇怪界》續作《奇奇怪界 黒斗篷之謎（奇々怪界-謎の黒マント-）》重製版消息，日前就正式放咗條實機遊玩展示影片，完全有返晒當年嘅味道，2022 年有得玩！

《奇奇怪界》為 TAITO 於 1986 年始創嘅街機平面射擊遊戲，玩家飾演巫女小夜（2P 係用狸貓），為咗拯救落入妖怪手中嘅七福神所以開始伏魔之旅。遊戲特色在於有使用符具嘅遠程攻擊，亦有使用淨化掃撥開子彈嘅近距離攻擊，係一隻操作簡單、但非常上癮嘅遊戲。

今次重製版由「TENGO PROJECT」開發，由部份曾經參與原作開發嘅成員所組成，所以今次影片見到完全有返晒當年嘅味道，不但沿用 16 bit 點陣形式，玩法上亦無乜改動，但係畫面及聲效上面就有作出進階提昇，特別係流暢度嘅強化非常明顯。

《奇奇怪界 黒斗篷之謎》現定於 2022 年 4 月 21 日發售。對應平台為 PS4 及 Nintendo Switch。