講到家中運動遊戲，應該十個有九個都會即時諗起《健身環大冒險》，但係除咗呢隻遊戲，早排有另一隻同樣主打家中運動嘅遊戲《家庭訓練機》推出，小遊戲不但玩味更濃，仲支援雙人遊玩，非常適合家中有小朋友或者同另一半一齊 Keep Fit！

《家庭訓練機》係一款體感運動遊戲，由 Bandai Namco Entertainment 開發。遊戲曾經喺 Wii 推出，黎到 Nintendo Switch 上面不但畫面更靚，操作亦由以往嘅「跳舞氈」轉為 Joy-Con 加腿部固定帶，更加便利（Joy-Con 感應算係準確，不過「跳躍」動作就偶然會誤判）。遊戲基本動作主要都係圍繞跑步同跳躍兩個動作，再因應不同類型小遊戲增加如上下揮動、左右迴旋等動作。睇落簡單，但因為要不停跑跳，玩一陣就已經身水身汗，運動量絕對唔細。

呢款小遊戲就係要跑要跳

本作以小遊戲為主，內置障礙賽跑、急流獨木舟、越礦飛車、打地鼠等十六款遊戲，而且全部都支援雙人同遊，一齊玩可以話係極之歡樂，最正嘅係《家庭訓練機》繁體中文版隨盒附送兩個腿部固定帶，唔洗額外買，幾貼心。另外遊戲支援 Mii 功能，玩家可選取自己嘅 Mii 作為遊戲中嘅替身遊玩。

要一邊狂跳一邊控方向，都幾難玩

要 Keep 住上下揮動 Joy-Con 加速，轉彎時要全身配合，非常過癮

急流獨木舟係另一款要全身配合嘅小遊戲，要不時改變方向進入激流區，好考操作技巧

遊戲提供三個模式，主模式「體育大冒險」預設初、中、高強度訓練菜單，可因應自己需要揀選適合嘅菜單，唔滿意的話都可以自行設計菜單。唔想跟辛苦玩晒成個菜單，亦有「消除運動不足訓練」模式，主要係針對想「郁下」嘅朋友，進行 2 – 10 分鐘左右嘅運動，完結後亦會簡單紀錄運動量。最後就係「自由遊玩」模式，可自由選擇任一小遊戲遊玩。

唔想下下「Chur」都咁盡，可以玩輕鬆模式

玩完之後會有簡單紀錄，可惜無列明消耗咗幾多卡路里

總結：

《家庭訓練機》小遊戲整體都幾有趣，可惜嘅係遊戲數量比較少，以 Party Game 黎講起碼都要有返 2-30 隻小遊戲（其實加強版好應該將 1&2  代遊戲整合）。好在體感運動遊戲暫時只有佢一款有多人同遊功能，想同屋企人一齊玩的話佢係唯一選擇。另外因為 NS 版唔洗用「跳舞氈」，玩之前強烈建議大家鋪返塊厚身嘅瑜珈氈，唔係不停跑跑跳跳的話隻腳好快痛，喺 D 字頭軍火庫有得賣，百零蚊貨就夠用。

編輯部評分：7／10