《生化危機 8》（BIOHAZARD Village／Resident Evil Village）出咗好幾日， 外國媒體就多數係讚嘅，不過坊間評價就有讚有彈，作為一名《生化危機》多年 Fans，我覺得今集的確有唔少地方做得唔錯，但當然亦有可以做得更好嘅地方，下面會為大家講下到底有咩優劣之處，不妨作為入唔入手嘅參考。

開場有段「添布頓」味動畫，幾新鮮

首先慣例都要講一講畫面表現，畫面上就交足功課兼係水準之上，但因為要兼顧 PS4、Xbox One，所以喺新世代主機上除咗光追之外並無用盡新主機機能（估計連一半都無），相信要有真正新世代畫面要等到下集先有了。雖然畫面唔夠「新世代」，但係流暢度就做得好好，使用 Xbox Series X 遊玩完全無 Drop Frame 嘅問題，值得一讚（Load Game 仲快到爆）。

畫面未用盡新機機能，但絕對交足功課，流暢度仲好好添

今集嘅場景一如其名「Village」，以被感染嘅村莊與四個區域連結，就好似入咗「生化危機主題樂園」咁。呢個做法對比起舊作自然地圖連貫性無咁好，但係咁嘅設計令到每區都有各自嘅特色，就連核心玩法、氣氛都有所不同。例如巨大貴婦係類似初代玩「箱庭式探索」、工廠就玩摸黑打強化敵人，當中最特別係人偶師果關變為類似《Outlast》嘅玩法，即係無武器反擊、遇敵只能夠躲藏，呢種玩法放喺《生化》系列感覺頗為新穎，不過呢部份個人認為可以做得更好，下文再述。

人偶師關卡變為類似《Outlast》嘅玩法，真係幾有恐怖感

戰鬥部份基本上同上集差唔多，大部份情況下都有足夠嘅時間俾玩家瞄準、走位，萬一失手被咬前都可以用擋格減輕傷害，整個系統對新手非常友善。由於商人嘅回歸，武器改裝、賣物、補給品等等就變返四代嘅感覺，同時擊敗敵人會掉落金錢或者戰利品以供出售，呢部份就直頭同四代一樣了。

正常難度下，後期敵人強度追唔上武器強化，有少少「切菜」嘅感覺

需要解謎嘅地方有唔少，可惜難度偏低，但樂見製作團隊加返解謎要素（大家望下隻 RE:3……）

今集取消系列名物「次元儲物箱」，亦即係話所有道具都要放晒喺身上走黎走去，所以久唔久就要「砌格仔」用盡每一格空間，有錢時就去商人度擴充手提箱空間。幸好今集藥草、火藥、鎖匙等物品係屬於另一類別，完全唔佔手提箱空位，如果唔係就真係難玩到嘔了。

劇情方面為免劇透唔講得太多，不過個人嘅感覺係「引人入勝」，四天王嘅人物塑造以及背景設定都做得唔錯，特別係海森堡喺了解之後你會發現佢更接近科學家多於痴線佬。另外 Ethan 喺今集嘅經歷，佢個女成為敵人目標嘅原因，隨故事推進再諗返上集嘅劇情，一切恍然大悟之後令人更期待下集三部曲收尾嘅故事，犯駁位亦都算少（唔係無）。

另外，有唔少人擔心無玩過上一集，直接玩今集會唔會唔知講乜，我可以答你「會」。開始時雖然有條短片簡單講返上集故事大概，但當中所有同後期故事有關嘅部份一律無提，而呢個重點又同今集故事有極大關連，所以想真正了解劇情講乜的話都係建議玩返上集會好啲。

上面講咗咁多，又講返少少個人感想。論氣氛、壓逼感係有嘅，但恐怖感欠奉（官方自己都講明今集唔恐怖），無一步一驚心嘅感覺。部份可以發揮得更好嘅場景，例如人偶師大屋地庫玩《Outlast》式捉伊因，受限於場地細及單一敵人，真正要匿嘅位其實只得一個，有點浪費。Boss 戰就要喺大屋嘅人偶海入面搵返隻頭目人偶出黎，由於只有頭目人偶係著白色婚紗（其他都係黑衫），要搵佢完全無難度。如果將之改為只有部份不同，假嘅人偶同樣可以互動，但係每次搵錯都會受到傷害，整場 Boss 戰設計就更為完整同緊張，期望之後嘅 DLC 或下集有所改善。

有埋互動圖示，慌死你睇佢唔到咁

（微雷注意）另外極有個人特色嘅海森堡，設定上係擁有控制磁力嘅能力，加上佢手上嘅大錘，本身已經有強大嘅 Boss 味道，可惜最終戰一埋牙就變身巨大化。如果先經歷一場人型態戰鬥，擊敗之後先變身，咁樣似乎更符合故事發展，而家就好似有啲浪費人型能力設定。同樣情況喺吸血鬼三姐妹一樣有出現，出場時間、劇情太少，搞到好似有造型嘅雜卒一樣，比較可惜。

巨大貴婦如果改為好似 Mr.X 咁頻繁出現已經會大增壓逼感，加上每次擊退有特殊獎勵的話就會令人想同佢正面對決

磁力王有人型態 Boss 戰的話就更完美

另外一個問題就係作為故事核心人物（最強回復力生化主角） Ethan 喺遊戲中係無樣貌顯示的，我理解製作團隊係希望玩家更有「我就係 Ethan」嘅感覺，但有埋個樣的話相信會更好代入故事嘅發展，就好似你玩《FF 7》都唔會唔知 Cloud 係咩樣啦係咪？

總結：

由於今集唔係打喪屍（其實四代開始已經唔係），主角亦都唔係大家熟悉嘅 Jill、Chris、Leon、Clare，難免有種「唔夠 Bio」嘅感覺（個人覺得近年最有 Bio 味又好玩嘅新作首推《Revelations》）。又老實講，今次劇情以現階段黎計雖然寫得唔錯，但係咪值得列入正傳故事就真係見仁見智，如果佢係作為同一世界觀下嘅外傳故事推出相信會更為人所接受，就好似 Nier 同 DOD 嘅關係咁。

縱然有美中不足嘅地方，整體上《生化危機 8》確實係做得唔錯，係第一身視點仲未習慣（玩足咁多代第三身，真係好難慣）。遊戲入面每種元素都有，遊玩時數第一次通關都要十個鐘左右，再加埋繼承要素、傭兵模式，隻 Game 真心抵食夾大件。劇情上亦都見到團隊想整理返成個系列世界觀重新出發，長遠黎計點都係好事。

如果未接觸過呢個系列嘅朋友，今集整個系統都對新手非常友善，可以試下入坑。

編輯部評分：8／10

《生化危機 8》（BIOHAZARD Village／Resident Evil Village）已經推出，對應平台為 Xbox Series X|S、Xbox One、PS5、PS4、PC。