解謎遊戲有唔少，當中有質素而謎題有返咁上下難度嘅就唔係咁多。今次介紹嘅《Tiny Room Stories: Town Mystery》係一款解謎小品，不過遊戲中嘅謎題就絕不簡單，經常性會玩到卡關，自問對呢類遊戲有興趣嘅朋友要留意啦。

《Tiny Room Stories: Town Mystery》由獨立團隊 Kiary Games 製作，係一款懸疑解謎遊戲。玩家將扮演一名私家偵探，有一日收到父親嘅來信，希望玩家去一座小鎮幫忙，點知去到之後發現整個小鎮空無一人，於是玩家就要探索城市並解開謎題尋找父親嘅下落。

遊戲基本上係類似 3D 立體版嘅密室逃脫玩法，玩家要透過轉換視角尋找線索，同時角色並非被困於單一場景，要喺整個小鎮多個地方探索，解開相關謎題後會得到更多線索，而線索間又互相有所關連，藉此一步步解開故事真相。雖然謎題數量甚多，但係好少重複利用謎題，大部份都係獨立嘅設計，非常多元化。

遊戲越後期嘅謎題就越難，部份謎題仲需要玩家代入設計者嘅思路去諗破解方法，可以話係難到嘔。通常同類型遊戲會有「提示」功能，卡關時俾小小提示下一步應該點做，但係呢隻遊戲就接近無呢樣設計，唔係太貼心。

《Tiny Room Stories: Town Mystery》已經推出，對應平台為 Nintendo Switch、PC Steam、Mac、iOS、Android。