Bethesda 位於美國德州奧斯汀（Austin）嘅工作室日前公開招騁人手，因此被發現公司正著手開發一隻全新未公佈嘅遊戲作品。

招騁廣告表示，Bethesda 正著手開發一隻 3A 作品，而呢隻作品目前尚未對外公開過，所以相信與目前已公佈嘅《上古卷軸 6（The Elder Scrolls VI）》以及《星際戰場（Starfield）》並無關係。

由於 Bethesda Austin 工作室曾經協助開發《Fallout 76》，而今次佢地亦要求應徵者有網路功能提昇嘅知識，並負責遊戲開發嘅後台建設穩定性工作，所以唔少網友都猜測作品會唔會與《Fallout》系列有關；不過《Fallout 76》於推出之後，因為網路功能不穩以及平衡性有待改善，因此 Bethesda 會否於咁短時間內就重新開發一隻 Co-Op 版本嘅新《Fallout》亦都係耐人尋味之處；至於《Fallout》正傳系列一向唔係 Bethesda Austin 負責，所以有理由相信今次嘅新作品唔會係《Fallout 5》。

目前已知嘅係，Bethesda 有一隻未公佈嘅 3A 大作正在初步開發階段，而呢隻遊戲重視網路功能，所以有好大可能係多人聯機遊戲。我地會繼續留意 Bethesda 嘅新消息，日後繼續為大家報導。

目前《Fallout 4》《Fallout 76》《The Elder Scrolls V》等等作品已登錄 Xbox Game Pass。