又有限時免費遊戲拎啦！曾經得到多個獎項提名嘅《The Dream Machine》，由今日開始將會提供首兩章免費下載，遊戲雖然推出多年，但係獨特少見嘅黏土美術風格配搭精彩嘅劇情，令遊戲持續得到「極度好評」評價，未玩過呢款遊戲嘅趁機會拎咗先啦！

《The Dream Machine》由 Cockroach Inc. 開發，係一款指向點擊解謎遊戲（即係齋 Click Mouse 果種）。故事講述主角 Victor Neff 同妻子搬到新居時，發現呢間公寓怪怪的，偶然間仲發現一部可以進入其他人夢境嘅機器，到底一切事情會點發展？

遊戲最大嘅特色就係所有嘅人、物都係用黏土加紙板結合成模型，再以實景拍攝製作。由於遊戲係非常地血腥獵奇，配以黏土美術出黎嘅感覺就係極之詭異，喺呢種氛圍下探索解謎係有種與別不同嘅沉浸感（特別係本作謎題唔簡單，有返咁上下水準）。

《The Dream Machine》適逢十週年，製作人決定將首兩章限時免費，由 5 月 11 日淩晨 1 點到 5 月 18 日淩晨呢段時間可以免費下載並永久儲存。玩完頭兩章想繼續的話，第三至第六章都做緊 75% 特價優惠，不過要留意本作並無中文，對應平台為 PC Steam。