2019 年時曾與大家介紹過恐怖動作歷險遊戲《Chernobylite 切爾諾貝爾》（相關報導），呢隻由波蘭遊戲工作室 The Farm 51 開發嘅作品，於 Steam 平台早期體驗期間獲得極度好評，官方宣佈作品會於 2021 年 7 月份，正式登錄埋 Xbox One｜Series X｜S、PS4｜5 平台。

《Chernobylite》係一隻採用第一視點、並以「切爾諾貝爾核事故」作為創作原點嘅作品。自從 1986 年切爾諾貝爾核電廠爆炸之後，該地區死傷無數，估算是次核爆炸所洩漏嘅幅射，為廣島核彈原爆嘅 400 倍左右；切爾諾貝爾核電廠爆炸後，區域一直封閉，禁止出入，形同廢城。由於是次事件影響嚴重，政府嘅低透明度資訊，亦都為該地區蒙上一層濃厚嘅神祕面紗。（該地區於 2019 年開始有限度開放）

玩家飾演曾於核電廠工作嘅科學家，核爆事件發生後，你雖然得救，但係你嘅伴侶卻於災難中失蹤。因為無法接受呢個事實，於是你決定闖進呢個核爆遺址，意圖搵返自己另一半嘅線索。

工作室 The Farm 51 以攝影以及 3D 掃瞄技術，將現實中所見嘅核電遺址以及周遭地區重現於遊戲之中。遊戲共有數個大型區域，玩家可於各個區域中自由探索，沿路配以幅射檢測儀器、食糧、各種道具，助你完成遊戲中每個主線及支線任務。

同時，玩家並唔係獨自出行，你必須都要聽取同行隊友嘅建議、注意佢地嘅需求（例如係提供食物或藥物），如果一意孤行，有可能會因衝動行事而死亡。玩家與朋友可建立「營地」，可以於當地休息、重整裝備；營地亦可以透過玩家收集到嘅資源去強化以及擴建，例如係增設生活作息區域或廚房等等。

遊戲亦有戰鬥元素，於遺址裡面，不時會出現靈異畫面，亦會有閃爍著綠光嘅異型生物出沒，佢地對玩家一行人抱有強烈敵意，因此如何裝備適合嘅武器，都係玩家需要注意嘅部份；同時天氣對於敵人偵察玩家行動都會有所影響，例如落雨日子會消除腳印等等，係一隻製作非常精細而真實嘅遊戲。

《Chernobylite 切爾諾貝爾》已經於 Steam 平台上面推出，預計 2021 年 7 月份會正式登錄到 Xbox One｜Series X｜S、PS4｜5 平台。