今時今日 Tower Defense（塔防）類遊戲大家都唔會陌生，但令到呢類型遊戲真正光輝嘅時代一定要數到《魔獸爭霸 3》，因為強大嘅地圖編輯器，一眾創作者製作出各種極之優質嘅塔防遊戲，當中《Element TD》（元素塔防）更加係最受歡迎嘅地圖之一。經過十五年歲月，《Element TD 2》終於結束長達一年嘅搶先體驗，喺今個月頭正式推出，並不負眾望得到「極度好評」評價。

《Element TD 2》由 Element Studios 製作，係一款策略塔防遊戲，支援最大 8 人遊玩。遊戲玩法係基本傳統塔防，怪物有固定出生點，以固定行走路徑前往終點，玩家需要係路徑周邊設置防禦塔消滅怪物。本作最大嘅特色係有光、暗、水、火、木、土六種元素塔，每種都有獨特嘅能力、強弱之處及升級路線，玩家需要觀察敵人嘅種類以及弱點元素，以 44 種不同嘅特性嘅塔構建出自己嘅防守風格。

遊戲現時單機戰役模式提供 28 個不同地形、敵人種類及魔王任務，仲有生存模式、團戰模式等，當然唔少得線上績分排名。官方亦表示會持續更新，包括新戰役、新合作地圖、自訂熱鍵、更完善中文化等等，6 –  7 月會為遊戲做平衡性更新，今年內亦會有額外付費 DLC 加入可以自製迷宮路徑嘅模式「Maze Mode」。

《Element TD 2》已於 4 月 3 日推出，對應平台為 PC Steam，支援繁體中文。