PlayStation 總裁 Jim Ryan 宣佈將會繼續維持 PS3｜PSVita 嘅線上商店服務，玩家可以繼續經由兩部主機於線上購買遊戲。

3 月份時我地曾經報導過「SONY 極大可能於今年夏天陸續關閉 PSP・PS3・PSV 網上商店」嘅消息（報導按此），後來 PlayStation 不久後對外宣佈消息屬實。由於當時 PlayStation 消息欠缺透明度，未有好好交代「日後如何下載已經購買了的遊戲」，加上消息來得突然，令到唔少玩家怨聲載道。

在不足於一個月的時間後，PlayStation 總裁 Jim Ryan 轉口風，表示好高興為玩家帶來好消息：公司決定延長 PS3｜PSVita 嘅線上商店服務，而 PSP 嘅線上服務則會如期於 2021 年 7 月 2 日正式完結。

PlayStation 原本預計於 7 月 2 日關閉 PSP 及 PS3 的 PS Store；並於 8 月 27 日中止 PSV 的 PS Store。作為陪伴唔少玩家渡過青春嘅遊戲機，佢地對應嘅線上服務已分別營運了 16 年（PSP）、15 年（PS3）以及 10 年（PSV）。

Jim Ryan 又表示，自己一向都會好好聆聽玩家聲音，所以縱使繼續營運 PS3｜PSVita 線上商店服務對公司黎講係多咗工序，都仍然會有今次呢個措施，希望玩家多多支持。