《Witcher 3: Wild Hunt》製作人 Stan Just 帶領新成立工作室，於 2022 年為玩家呈獻全新黑暗神話求生策略遊戲《Gord》。

《Gord》為一隻黑暗風格奇幻遊戲，預計於 2022 年率先登錄 PC Steam 平台。遊戲以斯拉夫神話及文化作為背景，包含都市建設、求生、策略等等要素，整體瀰漫住滿滿《Witcher 3》以及《Frostpunk》 嘅氛圍，未推出市面已經獲得唔少媒體及玩家注意。

玩家於《Gord》中，將領導部落嘅人民探索禁地「Sia」，你需要建立有良好居住質素嘅村落，亦需要做好防禦外敵入侵嘅措施；簡單黎講，就係要建立屬於你嘅要寨。守護你嘅人民，係玩家於遊戲中嘅首要職務。

不過玩家並唔只係玩緊「Sim City」，因為你嘅人民除左衣食住行，遊戲中仲有類似 SAN 值嘅「精神值」設定，面對疾病、親人嘅生老病死、或者係環境惡劣變化等等情況，都會出現精神力下降，進而失去理智暴走嘅後果。

「信仰」於遊戲中亦相當重要，除左可以加強人民嘅抗壓力之外，佢地亦可以依循宗教以及對「神」嘅信仰，學習各類型嘅魔法，對於戰鬥部份將會產生極大幫助。

遊戲裡面有大量支線以及隨機引發嘅事件，亦容許玩家自訂場景，例如係天氣、己方嘅能力值、敵人嘅強度等等，耐玩程度極高。敵人除了其他部落，亦會有野獸侵襲、毒蟲災害等等。

《Gord》亦有獨特嘅「編年史」系統，除咗於遊戲當中加插唔少真實存在嘅斯拉夫民族事件之外，玩家於遊戲中亦會收集到唔同嘅線索同埋書頁，裡面都有為你揭示更多遊戲故事嘅真實面貌。

《Gord》由 Stan Just 新成立嘅波蘭遊戲工作室 Covenant.dev 開發，亦為工作室首隻面世嘅遊戲 IP。Stan Just 曾分別於 11 bit studios 以及 CD PROJEKT RED 任職多年，亦為《Witcher 3 Wild Hunt》以及其眾多資料片嘅製作人。是次作品將會率先登錄 PC Steam 平台，預定 2022 年正式上市。