生存遊戲大家玩得多，呢類遊戲通常都係荒野或者絕地尋找資源，不過今次介紹嘅遊戲《Garbage》就係要玩家扮演無家者，堅係每日都玩家「求生」。呢隻咁另類嘅遊戲只有一個目標，就係要成為「無家者之王」。

《Garbage》由立遊戲團隊 Homebased 開發，係一款策略模擬生存遊戲。遊戲中玩家將扮演一無所有嘅無家者，由開始得條底褲慢慢奮鬥，透過各種「方法」逐步成長，努力地喺社會最下層活過來並設法成為「無家者之王」。製作團隊強調玩家會感受到我地認為係理所當然嘅生活原始元素，例如保持溫暖、吸取營養、衛生等等全部都會成為生活上嘅問題。

遊戲中玩家開頭只能夠喺小巷後街等地方尋找資源（即係執垃圾），然後結識其他無家者，再組織屬於自己嘅集團（丐幫？），再參與各種合法或非法嘅活動賺取資源。根據官方介紹，正路嘅玩家可以打地下拳賽賺錢、挑戰其他地區嘅無家者集團等。衰啲嘅就可以呃細路，又或者襲擊附近教堂啲信徒搶走財物。現時已知道整個地圖會有五個可供探索嘅大地區加三十多個小區域，然後會有各種獨特隨機事件發生。

要組成自己嘅集團就梗係要有基地，系統上有幾細緻嘅建築系統，包含好多獨特嘅建築物以及升級功能，不過由於係無家者嘅關係，所謂嘅建築物好多都係由卡板等雜物堆砌而成的，當然仲有合成各種裝備、道具嘅庫存系統啦。

有基地之後當然要配置人手，玩家可以僱用流浪漢（無薪）去你基地工作，然後玩家就負責訓練、餵食佢地。由於本質係流浪漢嘅關係，所以唔洗咩特別照顧都可以生存，但就要留意返本作有天氣系統，日夜及四季轉變對生存有非常巨大嘅影響，同現實生活非常相似。

《Garbage》預計於五月推出序章，而試玩版《Garbage: Hobo Prophecy》就係免費下載，兼且得到大多好評，對應平台為 PC Steam。