扮演蘇聯特務就唔係咩新鮮題材，但係加埋大戰機械人，又有極靚畫面，同時又喺新世代主機推出，成件事係咪吸引好多呢。由 Mundfish 製作嘅《Atomic Heart》雖然仲未有上市日期，但係之前放出黎嘅實機影片以及早排嘅即時運算相片模式，可以見到有驚人嘅水準，極之吸引！

《Atomic Heart》係一款科幻角色扮演動作遊戲，採用第一身視點，開放世界。遊戲背景為虛構嘅蘇聯世界，機器人、AI 科技已普及化，不但協助人類生活，有部份更加係為咗滿足工業需求而被製作出黎。好景不常，因為系統故障導致所有機械人失控。扮演「P-3」KGB 特工嘅玩家就奉命去到機械人根據地 No. 3826，消除一切阻止世界毀滅。

遊戲戰鬥系統主要靠聚合手套嘅特殊能力，可以將環境、物體、自己嘅身體，甚至係敵人本身都變成武器，戰鬥風格極為豐富。另外將零件組合後有高達三十多種遠近武器使用，喺之前嘅實機展示影片中睇到，不論係打中敵人嘅手感或者係敵人被擊中時踉蹌嘅反應，都做得非常紮實。另外根據官方嘅說法，本作並唔係單純劈劈射射嘅爽系遊戲，而係要研究敵人行為，並觀察招式間關係再以技能破解（例如透視技能），都幾考技術。

早前發表嘅即時運算相片模式影片中，以慢動作鏡頭逐部份展示畫面細緻程度，由主角嘅毛孔、鬚根，到槍械外觀紋理，再到子彈軌跡及火花特效、煙霧等細節皆有極佳表現。又因為得益於光線追蹤及 DLSS，地面上嘅水坑、光源反射於機械人金屬質感上嘅表現都係好精彩，希望到正式版時唔好走樣啦。

《Atomic Heart》現時未有確實推出日期，對應平台為 Xbox Series X|S、Xbox One、PS5、PS4、PC Steam。