又有一款新恐怖 Game《Death Escape》上市，今次唔係主打跳出黎嚇你一跳果種玩法，而係利用玩家對未知神秘現象帶來嘅恐懼同無助。遊戲現時做緊搶先體驗，短時間內已經得到大多好評評價，雖然仍有唔少缺撼但絕對值得一試。

《Death Escape》由單人開發團隊 Darktree Game 製作，係一款恐怖解謎生存遊戲，採用第一身視點。遊戲中玩家將穿梭於廢棄醫院、神秘豪宅或者古老地牢中，並躲避黑暗中可怕怪物嘅狩獵。同時，玩家要收集古代硬幣並設法逃離呢個地方。

遊戲特別之處係所有嘅怪物都係隨機出現，而各種道具都係隨機生成，即係話每次遊玩都會有新嘅體驗，增添刺激感。另外玩家好多時都需要劏屍體，因為好多有用嘅道具，甚至係通關物品都會喺屍體中搵到。根據開發者所言，現時只係想玩家感受下遊戲機制，到正式版推出之後會有更完整嘅劇情、地圖以及更多嘅敵人。

《Death Escape》現時做緊搶先體驗免費下載，對應平台為 PC Steam。