Xbox 針對自家平台 Xbox Series X｜S 而推出嘅 Xbox 無線耳機已經上架，我地早前亦都體驗過呢隻耳機，今日同大家簡潔地做少少分享。利申呢篇文係純用後分享，無收廣告費的，但係 Xbox 想比錢我地出稿嘅我地好歡迎，比大家參考下。

Xbox 無線耳機 Xbox Wireless Headset
官方零售價 HKD 648

綜合而言，Xbox 無線耳機嘅價表現效能，喺呢個價位黎講相當不錯。耳機能夠清晰表現腳步聲以及槍聲嘅距離與方向感，例如以《The Outer Worlds》為例，玩家同行嘅兩個角色，會自動出去戰鬥，亦會不時於戰鬥中喊話；用 Xbox 無線耳機能夠清晰辦認到兩位角色身處嘅方向，以及估算到佢地離自己有幾遠。對於慣玩團戰、槍 Game FPS 例如《Gears of War》《Call Of Duty》等等朋友黎講，Xbox 無線耳機嘅表現效能絕對能滿足你地嘅需求。

比較美中不足嘅係，Xbox 無線耳機嘅整體音感比較生硬及單薄，如果係鍾意玩單機 RPG、非常重視遊戲沉浸代入感、要將遊戲 BGM 聽得清清楚楚嘅朋友，Xbox 無線耳機嘅聲線呈現，就略嫌唔夠圓渾厚實了。

至於重量方面，呢隻耳機尚算輕身，耳綿造得貼耳舒適，試用兩小時都未覺會好焗或者有潮濕感；對於戴眼鏡或者頭型比較大嘅玩家，耳機嘅造位可能會有少少「夾耳仔」嘅狀況，不過影響未算好嚴重；不過呢隻耳機嘅耳綿，睇黎就唔可以更換，假如隻耳機有一日用到「甩皮」嘅話，到時要自己忍耐一下換過隻了。

由於耳機係針對 Xbox 而設，所以初次連結主機、以及進行更新程式，全部都只需要靠藍芽進行，線都唔駛插，兩分鐘搞掂，極度方便，真係買返黎坐低就用得，呢一點對於懶人玩家如我，真係非常方便。同埋開 Party 同埋遊戲聲幾乎無 Delay，呢一點做得唔錯。

快速 wireless 更新中

另一方便之處係，耳機左右邊圓盤本身就係音量控制器，玩家可以快速扭動右耳盤調整整體音量，亦可以用左耳盤選擇要放大 Party 音量、抑或遊戲音量。

雖然呢個「Party 與遊戲音量」分開調整嘅功能並唔係 Xbox 無線耳機嘅專利（例如我目前常用嘅 Razer Kaira Pro for Xbox 都有），不過 Xbox 無線耳機直接轉耳盤就可以較聲呢一點，方便度係高嘅。

耳機除左 Xbox Series X｜S 同時都對應 PC Windows，充電之後可使用大約 15 小時左右。至於其他官方公佈過嘅硬件資訊，我喺本文中就唔再重覆了，有興趣嘅玩家可以參考官網介紹；呢篇文章主要係想以玩家角度，分享真實嘅使用感受。

市面上而家通用而優良嘅 Xbox Series X｜S 耳機，包括 TurtleBeachStealth 700 Gen 2 耳機，以及頭先提過嘅 Razer Kaira Pro for Xbox。雖然日後我都打算就呢三隻耳機寫多一次比較文章，不過如果預算唔多，呢隻賣緊 HKD 648 公價嘅 Xbox 無線耳機相信係目前市面上最平、而表現最穩定嘅入門耳機，有需要嘅玩家可以考慮入手。