攀山呢個動作喺大量作品如《刺客教條》系列、《薩爾達傳說曠野之息》等都有出現，不過講到齋玩攀山嘅遊戲就真係無乜。今次介紹嘅遊戲《Insurmountable》無解謎無怪打，真係齋玩攀山，有興趣嘅朋友留意啦。

《Insurmountable》由德國獨立團隊 Byterockers 製作，係一款回合制策略生存遊戲。遊戲中玩家將由三位角色中選擇一位挑戰攀登山峰，當然每個人都有獨立嘅技能樹，並且可以喺冒險過程中得到新能力，例如喺稀薄嘅環境中減低消耗能力等，而角色一旦死亡將永久 GG。

遊戲將提供三座山供玩家挑戰，每次都會由程式隨機生成網格山路，所以每次遊玩都要重新規劃路線。喺攀山過程中玩家會發現山洞或者遺跡，有機會得到以前冒險家遺留嘅物品。當然亦有可能遇到充滿危險性嘅野生動物或者可疑嘅 NPC 等等，而且更有動態變化氣侯以及日夜交替，令冒險過程更具挑戰。

比較可惜嘅係遊戲並非即時動作玩法，無辦法規劃每一步要點爬、落腳點等等，投入度自然大減。不過始終係少數以攀山為主題嘅遊戲，仍然有一試嘅價值。《Insurmountable》預計於 2021 年 4 月 29 日上市，對應平台為 PC Steam，之後仲會推出 Xbox One / PS4 版本。另外官方新聞稿有提及會支援 Xbox Series X|S 及 PS5，以及將考慮推出 Nintendo Switch 版本。