上星期喺 Nintendo Switch 上面出咗隻有趣嘅小品遊戲《Monken Crusher》（モンケンクラッシャー），玩家透過操作拆樓用果種大鐵球起重機，去「拯救」被劫持人質，雖然設計簡單，但係玩落都幾有技巧同有趣味，極適合親子同遊。

《Monken Crusher》係一款以大鐵球起重機為主題嘅遊戲，即係大家平時見地盤用黎拆樓果種大型機械。遊戲中玩家需要用呢部機器，去拯救被被恐怖分子劫持嘅人質，方法就係用個大鐵球將建築物移為平地（然後屋入面啲人乜事都無，根本就個個都超人黎），擊敗恐怖分子並營救人質。除咗單機模式外，本作仲支援二人對戰，喺時限之外鬥快鬥高分拆樓。

遊戲基本玩法都係「Fing」個大鐵球去拆樓，不過要透過轉動 Joy-Con 去模擬搖桿控制機械臂，利用離心力摧毀建築物。隨著關卡推進，要摧毀嘅建築物將變得越來越大。另一方面，由玩家操作嘅起重機亦會根據幫助人質數量而解鎖其他型號，操作性同破壞力都會增加，但係型號不同會各有優缺點。

《Monken Crusher》已經於 3 月 18 日推出，對應平台為 Nintendo Switch，售價非常抵玩 ，只需要 990 日元。