香港地做業主唔係咁簡單，就算你有物業放租都隨時遇到「西客」，好在科技發達，就算對付「西客」都有得預早練習。講緊嘅係早排推出試玩版嘅《The Tenants》，雖然只係試玩版，但係短短兩星期已經得到「極度好評」評價，你話「西客」呢種生物係幾咁乞人憎呢！

《The Tenants》波蘭獨立團隊 Ancient Forge Studio 開發，係一款模擬經營遊戲。玩家將扮演業主出租名下嘅物業，並一直經營賺取更多物業，以建立屬於自己嘅地產王國為目標。遊戲中玩家出租嘅物業可自由設計，翻新油漆、舖地板、添置新家具等等，單位整得越靚叫價就可以越高。整好單位之後，自然要搵租客，但係呢個過程都充滿挑戰性，因為不但會有煩膠租客，亦有機會係乜春都投訴嘅西客，仲有機會搞到鄰居不和，隨時有警察搵上門，勁真實！

當玩家放租賺到咁上下時，就可以睇下市場有無新樓盤購入增加物業。但係市場價格會有波動，應該高價買靚地段玩「高風險高收益」，定係安安全全慢慢賺，全部都係由玩家話事。現時試玩版本只係開放第一個區域「貧民區」，同埋只有四種類型嘅租戶，到正式版時將更為豐富。

《The Tenants》將於 3 月 25 日進行搶先體驗，對應平台為 PC Steam / GOG / Epic Game Store，現時 Steam 平台上有試玩版提供免費下載，支援繁體中文介面及字幕。