《生化危機》系列應該都唔洗點介紹，一眾舊作喺電腦版向來都有唔少 Mod，不過就大多數都係改下模組換下衫咁。今次介紹嘅《Resident Evil: During the Storm》係一個擁有龐大內容嘅 Mod，不但新增大量劇情，系統上亦有作出唔少有趣改變，極之令人期待！
《Resident Evil: During the Storm》使用 1998 年原始版嘅《Resident Evil 2》嘅引擎同框架並作出修改，由 RECM Group 製作。遊戲時間線係發生喺浣熊市爆發初期，亦即係《Outbreak》同《Resident Evil 2》、《Resident Evil 3》之間，製作團隊亦表明希望透過呢個 Mod 去連接呢三個作品之間嘅空白。玩家將操作《Outbreak》登場角色「Kevin Ryman」，喺資源缺乏嘅情況下協助倖存者抵抗浣熊警察局內外嘅敵人。
遊戲中可自由探索《Resident Evil 2》、《Resident Evil 3》區域，除咗加入新嘅敵人之外，仲加入唔少新機制。遊戲中會有一個內部計時器，類似《Dead Rising》但並無佢咁嚴謹，主要用作時間推移及改變環境，當中會牽涉解鎖新區域、產生敵人、禁止部份副任務方法（即係有任務要限時內做完），最正嘅係部份副任務係會影響故事情節以及改變 30 個 NPC 個別人士嘅生死。
除咗以上更改，敵人行動亦有新機制。喺暴風雨期間敵人數量會減少，但係會變得會更具抵抗力同危險性，而且佢地仲識得開門跟隨玩家移動。有趣嘅係，玩家可以用鎖匙鎖門並限制喪屍嘅移動範圍，喺以下嘅片段可以見到呢個新機制演示。
當然遊戲中仲有大量嘅內容，但係我地就唔一一介紹了，留返俾大家自行發掘。製作團隊早前曾透露，《Resident Evil: During the Storm》嘅長度將會喺原版嘅兩倍，當中包括大量隱藏事物，而且喺一個 Demo 已經有五個不同嘅結局，正式版自然更多變化。
《Resident Evil: During the Storm》正式版預計於 2021 年上市，試玩版《Resident Evil: Calm Before the Storm》現已提供免費下載，注意需要有《Resident Evil 2‘s 2006 「Sourcenext」》日版先可以運行到。
《Resident Evil: Calm Before the Storm》下載傳送門
動漫電玩宅，極愛金田一系列，擅長動作及策略遊戲