擁有多年歷史嘅《Metal Max》（坦克戰記）日前舉行誕生生放送三十週年直播節目，一口氣公開多款新作。芸芸新作入面，最吸引我嘅就係呢款用《METAL MAX Xeno Reborn》入面嘅可愛狗狗波奇做主角嘅《Metal Dogs》，齋睇都覺得正！

《Metal Dogs》由 24Frame 聯同角川遊戲擔任製作，係一款 Roguelike 動作射擊遊戲，採用俯瞰視角。遊戲源用返《METAL MAX Xeno Reborn》世界觀，故事背景暫時只係知道波奇會遇到一位神秘老科學家，舞台就會喺富士山下，時間線則係《Reborn》嘅後續。

遊戲中戰鬥犬將會裝備火箭炮、雷射、機槍等各式武器，並且狩獵目標賺取賞金，然後再購買新裝備強化。暫時已知可裝備三種武器、兩種道具以及兩種防具，另外部份武器有插糟可加插強化配件，不過詳細內容都係要等後續公佈。

《Metal Dogs》預定於 2021 年初夏推出搶先體驗，對應平台為 PC Steam。

另外同樣喺誕生三十週年直播節目公佈嘅重有系列完全新作《Project WOLF》，以及原定於 2021 年推出，對應 PS4 / Nintendo Switch 嘅《Metal Max Xeno Reborn 2》正式改名為《Metal Max Wild West》，不過兩款作品資料都極少，相信要等到 5 月 23 日舉行嘅三十週年前夜祭活動嘅進一步消息。