之前我地做過評測嘅《羅德斯島戰記 蒂德莉特的奇境冒險》喺上年 3 月以搶先體驗型式推出，然後再續步增加新關卡。雖然以「斬件」方式更新，每次玩到尾就要等下次更新，但仍然無損遊戲嘅質素，並喺呢段時間得到「壓到性好評」評價。如果你仲未試過呢款遊戲的話就要注意啦，因為今個月尾將會推出正式版，可以一次過完整地遊玩。

《羅德斯島戰記 蒂德莉特的奇境冒險》（Record of Lodoss War-Deedlit in Wonder Labyrinth-），由 Team Ladybug 工作室開發，屬類惡魔城遊戲。遊戲以《羅德斯島戰記》世界觀為主軸，官方形容本作故事係 2019 年小說《羅德斯島戰記 誓約的寶冠》嘅劇情補完。遊戲中玩家將操控精靈使者ディードリット（Deedlit），於旅程中會遇上唔同嘅角色，亦會獲得唔同精靈嘅力量。喺今次正式版將會加入第五及第六章節。

遊戲特色在於喺《月下夜想曲》類惡魔城遊戲基礎下加入「妖精相剋」系統，即係類似知名射擊遊戲《斑鳩》嘅相反屬性，考反應考操作技巧，詳情可以睇返我地嘅評測文章 – 【遊戲評測】比月下更上一層樓 《羅德斯島戰記》青出於藍類惡魔城遊戲。

另外，為咗慶祝正式版上市，除咗有最後一次限時八折優惠，另一款同樣由 Team Ladybug 開發嘅《東方月神夜》（詳細評測文章）亦會有折扣優惠，或者購買呢兩款遊戲嘅組合包都有限時六折優惠（HKD $51.86），非常抵玩。

《羅德斯島戰記 蒂德莉特的奇境冒險》（Record of Lodoss War-Deedlit in Wonder Labyrinth-）正式版將於 3 月 27 日正式上市，對應平台為 PC Steam。

回帶相關文章：

【遊戲評測】比月下更上一層樓 《羅德斯島戰記》青出於藍類惡魔城遊戲

【遊戲介紹】東方系列類惡魔城橫向動作遊戲《東方月神夜 Touhou Luna Nights》Team Ladybug 大獲好評之作