三上真司製作嘅《Dino Crisis》（恐龍危機）自 1999 年推出後一直備受機迷熱愛，雖然仲未等到「RE」版，不過就有位有心人做咗一款極有初代《恐龍危機》味道嘅作品《Code：Dino-H》，現正進行免費配信中。

《Code：Dino-H》由獨立遊戲開發者 Jim Gennisson 製作，係一款恐怖生存潛行遊戲，同舊版《恐龍危機》一樣使用固定畫面視角，美術則模擬初代 PS 畫面。遊戲初公開時係以《Dinohazard》呢個名的，亦都係向《恐龍危機》同《生化危機》致敬。遊戲中玩家將飾演一名身處極寒地帶研究設施嘅倖存者，而且面臨無晒食物，又有速龍喺設施內徘徊嘅情況。為咗生存，玩家就要設法設法避開呢群恐龍，並尋找逃出設施嘅求生之路。

遊戲採用每個區域固定鏡頭表現方式，操作上亦類似舊式玩法，雖然都係用 WASD，不過操控方式係 W 前進、D 後退、A / S 向左向右轉，亦即係初代《恐龍危機》、《生化危機》嘅操控方式。基本玩法係探索設施，尋找燃料、剪鉗等工具並逃生。上面講到設施中有速龍群徘徊，不過玩家係並無任何武器作出反擊，有嘅只係房間中散落嘅容器，利用蹲伏等動作隱蔽地移動，並設法逃向其他房間鎖門限制恐龍嘅移動範圍。

另外萬一玩家被咬，角色將會受傷並會減低移動速度，一但被攻擊三次就會 Game Over，所以進行各種行動必需份外小心，加上固定視角下玩家看見範圍有限，玩起上黎就更有刺激感。

《Code：Dino-H》已經推出，對應平台為 PC，現時於 itch.io 上免費配信中。