有返咁上下年紀嘅朋友應該都記得以前機舖有隻 Game 叫《Photo Hunt》，後生啲嘅就應該識《Where’s Wally?》，不過兩者都係喺平面圖畫搵野。早排就出咗隻《Tiny Lands》z，保留找錯處基本概念，但係用立體型式表達，突破傳統玩法，而且仲得到「極度好評」評價，自用送禮都一流。

《Tiny Lands》由 Hyper Three Studio 製作，係一款立體解謎益智遊戲。遊戲基本玩法同大家熟悉嘅「找錯處」差唔多，都係喺左右兩幅相似嘅畫面中尋找不同，由於物件模組製作得非常細緻，所以物件嘅差異可能只係高矮、大小、位置等少許差別，並唔易搵。加上本作係以立體型式表達，玩家要透過旋轉畫面由多角度去搵不同，比起傳統玩法更有趣得意。

另外遊戲以輕鬆悠閒為主，所以並無時間限制，亦無點擊錯誤懲罰機制，大家可以放心慢慢玩。加上遊戲入面嘅聲效會因應主題而改變，例如餐廳場景會有碗筷碰撞聲、沙灘就會有海浪聲以及海鷗聲，令人更加投入。而且更會因應場景有各種天氣效果，例如雪、雷、雨等動態效果為場景帶來更多變化，就算係小品都誠意十足。

《Tiny Lands》已經正式發售，對應平台為 PC Steam，支援繁體中文。