大家平時玩開嘅遊戲多數都係日本、歐美、台灣等地方嘅出品，但其實香港都有人一直努力去創作。今次為大家介紹嘅就係香港製作嘅《卡爾傳說》（The Legend of Karl），推出短短時間已經得到「極度好評」評價，值得為佢哋鼓掌。

《卡爾傳說》（The Legend of Karl）由樂言社青年動畫學堂 Actplus 製作，係一款橫向動作角色扮演遊戲，採用 2.5D 風格。遊戲背景講述喺兩個平行宇宙 – 人類及聖靈，彼此唔知道對方存在，但實際上兩個世界係會互相影響。有一天兩個世界突然碰撞合而為一，主角卡爾成為意外後世上存活嘅少數人類，為咗尋找被聖靈族捉走嘅姐姐而踏上旅途，過程中將面對各種生死存亡、善與惡、權力與謎語、失落與救贖間掙扎。

遊戲打擊感表現不俗，值得一讚，玩法就同一般動作遊戲大同小異，都係一邊斬殺敵人一邊前進，當擊敗強敵後就會解鎖新武器。關卡中不乏要解謎嘅地方，不過難度只屬一般，亦都包含善惡走向嘅任務，都幾得意。

《卡爾傳說》（The Legend of Karl）已經推出，對應平台為 PC Steam，現時正開放免費搶先體驗，不過並無對應繁體中文。