Sony Interactive Entertainment（SIE）登記全新專利，聲稱將研發「將香蕉當成手掣用」嘅技術。

根據外媒 GamesIndustry.biz 報導，Sony 是次登記專利全名為「System And Method For Generating User Inputs For A Video Game」。目前所有家用主機必須要配合到手掣才能夠使用，唔單止限制操作性，亦容易製造電子垃圾；所以，Sony 希望日後可以一方面支持環保，一方面可以增加玩家嘅活動性。

SIE 於 2020 年 7 月已經申請呢項專利，而呢項專利亦於 2021 年 2 月獲得批准（文件），目標係令使用者可以將日常生活裡面常見嘅物品隨手拎黎當作手掣使用，而 SIE 亦在說明書中以「香蕉」為例，表示用家可以利用呢種技術，於 3D 模擬環境裡面進行互動，相信此舉亦係為左日後 VR 技術發展方面作準備。

簡單而言，玩家可以利用相機識別物品之後，就能透過「物件追蹤技術」，將虛擬按鍵投射到被追蹤物品之上，從而做到「隨手拎起都可以係手掣」嘅功能。

SIE 舉例的「日常物品」中，包括香蕉、橙、原子筆、馬克杯等等，不過目前就未有說明物品會否有形狀或者大小上面的限制，例如可唔可以呢用該項技術，將 Nintendo Switch 手掣變成 Sony 主機用手掣等等，都係未知之數。

目前 SIE 並未表明會於何時正式實施呢項技術，不過呢個有趣技術發明都值得玩家繼續留意。