開放世界、生存、恐龍，呢幾個詞擺埋一齊嘅遊戲相信好多人第一時間會諗起《方舟：生存進化》（ARK: Survival Evolved），但係呢款遊戲主打多人同遊，喺故事表達上就比較弱。黎緊有一款同樣係主打開放世界、生存、恐龍嘅遊戲《Dinos Reborn》，不過就主打單人冒險，喺故事表達上亦會比前者豐富，有興趣嘅朋友要留意啦。

《Dinos Reborn》由 HardCodeWay 開發，係一款動作射擊生存遊戲，採用第一身視點，開放世界。遊戲講述玩家喺一個陌生嘅海灘醒來，唔記得自己係邊個，亦都唔知點黎到呢個地方，淨係發現身邊四周都係太空船殘骸，然後驚見眼前出現一隻恐龍，而且經探索後發現呢個地方竟然有其他文明種族存在。為咗生存，玩家將成為獵人，解開呢個地方重重謎團以及回憶起自己身負嘅任務。

同《方舟：生存進化》類似，遊戲中同樣要消耗水、食物等生存必需品，亦都要備有藥物應對中毒、受傷等情況，同時要兼顧疲勞度。開始時玩家只能夠執石頭樹枝黎整工具、武器、陷阱、避難所等等，透過觀察、讀書、不斷重複練習就會學得更高階技能，然後就可以製作更精良嘅物品。

因為玩家要面對嘅係強大嘅恐龍，而且每種動物嗅覺、聽覺、視力都有所不同，所以喺狩獵時都係主打潛行並觀察其習慣、尋找弱點，再趁機攻擊弱點一擊必殺。喺叢林中除咗大型動物，仲有細小嘅昆蟲，部份係可以共存，亦有想將你當做食物嘅種類，玩家要細心分辨敵友種類。另外遊戲仲有天氣轉換以及日夜輪替，日落後會出現更強嘅捕食者，必需小心。

《Dinos Reborn》預定於 2022 年上市，對應平台為 PC Steam。