EA 及 BioWare 正式宣佈腰斬《Anthem Next》企劃。

工作室於 2021 年 2 月 24 日在官方網站上發出公告，表示團隊一直好努力嘗試地將《Anthem》由頭再做過，試圖令佢脫胎換骨，不過喺多番考慮之下，都係決定放棄將《Anthem》重製嘅《Anthem Next》企劃。

《Anthem》製作人 Christian Dailey 提到，疫症、WFH 唔單止令到工作室工作進度受阻，亦因此承受更大壓力，因此令到工作室對於《Anthem Next》嘅幹勁同信心不斷動搖。

在今個月稍早時份，Bloomberg 就曾報導過 EA 將會於近日就《Anthem Next》未來發展有新嘅定案（相關報導），因為自企劃公佈以來，工作室經歷核心開發人員跳船、大量缺乏人手（《Anthem》Team 大約得返 30 人）令到工作進度極為緩慢，如果要做到一隻合格嘅遊戲，起碼要比而家增加三倍人手。

睇黎 EA 最後都係決定唔再投放資源喺一隻「本身搞壞左」嘅遊戲上面，《Anthem Next》正式胎死腹中，相信都有唔少玩家同我一樣，唔多唔少有些微失望。

《Dragon Age 4》

不過 EA 有呢個決定都可以理解，因為工作室 BioWare 黎緊仲有《Dragon Age 4》及《Mass Effect》新項目正在開發當中，同時亦要保留人手營運《Star Wars: The Old Republic》，相信 EA 此舉考慮到各樣的公司利益。

EA 表示《Anthem》原版嘅網上營運會維持正常。