【遊戲介紹】極正復古橫向射擊《Huntdown》加入新元素街頭槍戰味更濃

每個年代總會有多過一隻極具代表性嘅橫向射擊遊戲，老一輩玩家會話係《魂斗羅》，後生啲嘅會話係《Metal Slug》，不過近年就好似無乜代表作。今次介紹嘅《Huntdown》都係橫向射擊遊戲，雖然玩復古風格，但係就加入新元素令遊戲變得更好玩，加上優秀嘅表現，有潛力成為近年嘅代表作。

《Huntdown》由 Easy Trigger Games 製作，係一款橫向動作射擊遊戲，採用像素風格，支援單機雙人遊玩。遊戲故事講述未來世界被各大犯罪幫派統治，警察為咗掃蕩佢地就聘請賞金獵人，亦即係身為玩家嘅你，以暴易暴。遊戲本身行復古風格，唔係齋用像素風格表現咁簡單，就連角色設定、美術上都非常有 80 年代荷李活電影味道，而敵人亦細緻地分為四個幫派，每個幫派都有各自特色，例如 Hoodlum Dolls 就係 80 年代 Punk 佬打扮， Misconducts 就係戴住《Friday the 13th》殺人狂 Jason 面具嘅冰上曲棍球隊，設定上極用心。

Hoodlum Dolls

戰鬥系統都係一貫橫向動作射擊咁玩，無 LV 升無裝農純考技術。武器主要分近戰、遠攻兩大類，近戰由棒球棍到武士刀；遠攻由手槍到火箭炮，種類非常齊全。至於基本玩法除咗一貫嘅蹲下、跳起、掩體避子彈外，仲有翻滾以及新元素「暗門」。「暗門」就類似槍戰片縮喺牆後面避子彈咁（不論敵我雙方皆可使用），但係接近攻擊或者用手榴彈一類武器係可以打返你出黎，唔好以為有「暗角」就做乜都得。