FFT（Final Fantasy Tactics）係一款極出色嘅戰略角色扮演遊戲，雖然係多年前作品但至今仍為人所津津樂道。喺較早前嘅「Nintendo Direct 2021.2.18」就公開咗一款全新嘅戰略遊戲 《Project TRIANGLE STRATEGY》，戰鬥系統、美術風格都非常唔錯，現時已開放體驗版下載試玩。

《Project TRIANGLE STRATEGY》係一款戰略角色扮演遊戲，以 HD-2D 風格美術畫面呈現。故事發生於陷入戰亂諾澤利亞大陸，玩家將面臨艱難抉擇，並捲入國家與國家之間嘅戰爭（一貫 SE 故事套路）。遊戲中將出現大量分岐選擇，並因應所選行動累積「BENEFIT」（利益）、「MORAL」（道德）、「FREEDOM」（自由）三種價值觀嘅「信念」，影響劇情發展及加入我方陣營嘅角色，亦即係話起碼有三條結局路線，確保遊戲耐玩度。

戰鬥系統就沿用如《皇家騎士團》一類戰略遊戲固有元素，例如高位向低位發動攻擊會增加傷害、擊飛敵人至我方隊友旁邊一格會發動連携攻擊、冰魔法後以雷魔法攻擊有追加傷害等等，加上各職業配合將會有多種攻略關卡方法。

《Project TRIANGLE STRATEGY》未有確實推出時間，但已確定中文化。對應平台為 Nintendo Switch，現時已開放體驗版下載。