細個玩《魂斗羅》嘅時候，玩完第一關由橫向捲軸射擊變成縱深立體視角嘅場景，雖然只係得兩關係改變視角進行，但已經覺得好似玩緊第二隻 Game 嘅感覺。如果將八、九十年代嘅動作射擊遊戲摸式集結成一隻遊戲新作，節奏極其爽快兼且非常有挑戰性，你又會唔會一試？

《Speed Limit》由克羅地亞獨立遊戲製作公司 Gamechuck 製作，成個遊戲由畫面到操控都極具古早味，操控簡單到只係得「上下左右、跳、射」，而最大賣點係喺關卡設計上。以一個橫向捲軸射擊開始，突然會因劇情變成俯瞰式賽車追逐，之後又會變成類 3D 空戰等等，成個遊戲流程完全意想不到。

挑戰性有返咁上下嘅遊戲難度，「死」係必定經常發生。《Speed Limit》最好嘅係當你不幸失手死亡，唔洗一秒就己經可以喺 Checkpoint 重新嚟過，死都死得爽過人！

《Speed Limit》下星期 (2 月 16 日)開始會正式登陸 PS4、Xbox One、Nintendo Switch 及 PC 等各大平台，而試玩版亦率先發放，有興趣挑戰嘅朋友去相關平台下載。