EA 之前推出嘅觸目大作《Anthem》（冒險聖歌），因為同官方宣傳片有極大分別，導致遊戲推出後被大量玩家唾棄，最終變成笑話。雖然我哋早前曾報導過 EA 已經同意咗將遊戲重製（即係《Anthem 2.0》），但係經歷核心開發人員跳船、缺乏人手等因素，計劃「伏」味甚濃，有消息指今個星期 EA 就會有決定計劃將繼續實行定走數。

根據 Bloomberg 報導，EA 管理層將會就《Anthem 2.0》計劃作出決定。雖然 EA 早就同意 2.0 計劃，但製作團隊 BioWare 經歷重大人事變化，現時負責 2.0 計劃團隊人數只有大約 30 人，要以呢個人數去重製一隻 3A 遊戲絕對係唔足夠的，要完成呢個項目最少需要現時三倍人手。基於呢個情況，EA 就要決定為製作團隊增加人手，定係決定走數。

現時 BioWare 開發緊《Dragon Age》新作以及《Mass Effect: Legendary Edition》，意味住無乜調配員工嘅空間，又考慮到 EA 好鍾意郁啲就關閉工作室，而《Anthem 2.0》會否挽回玩家信心又係未知之數，亦即係收益前景唔太樂觀，種種因素下我覺得 EA 走數嘅機會較大。

當然，以玩家角度梗係希望 EA 可以執返好隻 Game，話晒遊戲界有先例整返好之後玩家回流，例如《No Man Sky》、《FF 14》都係以大量嘅更新同改版重拾玩家嘅信心，而且《Cyberpunk 2077》亦都係努力做緊修復，如果《Anthem 2.0》有望實現，我都會俾多次機會佢。