由波蘭遊戲工作室 Bloober Team 開發的恐怖遊戲《The Medium（靈媒》於 2021 年 1 月 28 日正式推出，Bloober Team 素來以開發第一視點恐怖遊戲包括《Layers Of Fear》以及《Observer》而聞名，《The Medium》則係工作室首次推出嘅第三視點遊戲。

遊戲推出之前，「主角可以穿梭於人間與靈界」嘅系統設定令到唔少玩家感到興趣，不過遊戲推出之後，網上評價亦都頗為兩極，編輯部亦有一啲感想望與各位玩家分享。以下內容將含少量劇透，讀者們請注意。

《The Medium》完全見證到工作室嘅用心，無論係電影鏡頭一樣嘅運鏡，配合《Silent Hill》班底合作嘅音效與配樂，《The Medium》於初期營造氣氛方面是十分成功的，令到玩家能夠投入到故事裡面。加上，Bloober Team 並唔算係大廠，而遊戲亦唔算係乜野 3A 大作，但係喺美術、畫面構成、光影投射方面，都呈現出大廠的水準。

回顧返舊作《Layers Of Fear》（兩集分別於 2016 年＆ 2019 年推出）以及《Observer》（於 2017 年推出）嘅畫面，於短短時間裡面，畫面上面嘅進步，呢一點絕對要稱讚的。

不過，完善嘅畫面，唔代表就係一隻絕好嘅遊戲。Bloober Team 雖然有野心，但係能力所限，《The Medium》明明可以有更大程度發揮，可惜整體遊玩印象，有少少「雷聲大，雨點小」。

劇情方面，Bloober Team 係貪心的。我明白工作室「有心想做隻好遊戲」，佢地可能亦知道自己技術所限，唔可能喺遊戲系統上面，做到另一隻《Biohazard》或者《Silent Hill》出黎，所以佢地嘔盡心力，想要寫好劇本。

個劇本唔係唔吸引，但係，工作室想將太多主題元素擺入去了。劇本有幾個分支線，包括「蘇聯＆Nazi＆波蘭」、「虐待兒童（呢度我唔劇透）」「渡假酒店大屠殺之謎」「惡魔召喚」以及「陰陽眼」，就咁聽好似好豐富，但係由於遊戲篇幅所限（大約 6～10 小時遊玩時間），結果，故事雖然由頭到尾講得通，但係當中提及嘅一啲角色，佢地嘅經歷同故事，就變得有少少走馬看花了。

例如係遊戲中重要場景 Niwa 渡假村，裡面提到嘅看護，係一個好重要嘅角色，但係我玩完之後，對佢嘅印象就係「單戀失敗，失望所以暴走」。如果佢嘅心路歷程可以有更深入描寫，或者，至少比我見到佢係咩樣、或者加條回憶動畫之類，都會令佢嘅人格描寫具體好多。

而家呢位看護淨係得一個模糊白色人形嘅光影，就算我無期待你會整到《Silent Hill》個護士姐姐出黎，既然佢嘅角色咁關鍵，比返個人設佢，可能會令到件事深刻一點。

麻煩《Silent Hill》的護士姐姐們出黎飄過一下

相反，遊戲中及尾盤，由 Thomas 靈魂出竅嘅兩段劇情，佔嘅篇幅似乎過長（特別係紅色光海那一段太長了，玩到我眼都痛埋）。每段故事佔嘅篇幅比例，如果可以稍為平衡返一點，對改善整體遊玩體驗會有正面幫助。

雖然紅色於該段劇情有意思，但篇幅有點長，玩到對眼好痛

另外一個大問題係遊玩性單一。雖然《The Medium》做到好似一隻探索遊戲咁樣，但係，事實上玩家於每個場景中都係有所限制的。玩家只能夠跟住工作室規限嘅路線去活動、去感受劇情；而經過左嘅場景，大部份都唔可以再返去。

同時，每個場景裡面，玩家可以進行嘅 Routine 亦都類似，就係收集幾樣物品，將佢解謎｜歸位，或者從文字裡面了解劇情。去到後期，甚至有唔少場景只係一味直行，又無怪物、又無野需要收集，令遊戲變得頗為無趣。

場景可以進行的互動很少

換句話講，《The Medium》其實係一隻「包住探索遊戲外觀嘅 AVG 文字遊戲」，與 AVG 遊戲嘅兩個分別，或者就係玩家需要自行移動，以及故事無分歧無選項，玩家只能默默跟隨工作室設定嘅方向去走；而「自行移動」亦都只係「行路」而已，雖然遊戲中有怪物會追住你，但係「如何逃脫」呢一點，基本上都係直路一條，無甚挑戰性可言。

又例如，主角 Marianne 面對中盤～後盤時嘅兩個頭目級怪物，講就講到充滿怨氣同愁恨，但係女主角都只係好似英女皇咁「揮一揮手」，頭目怪物就 Bye Bye 了。我明白《The Medium》唔係動作遊戲，只係呢個「淨化惡靈」嘅過程似乎略為兒戲，有少少浪費左成段故事嘅苦心編排。

頭目：原本一直 Stand By 睇完動畫要走佬；結果，女主角揮揮手，他就淨化了～不帶走一點雲彩～

如果想做解謎型嘅遊戲，遊戲中嘅謎題應該提高返 10 個難度左右；如果想做有動作成份嘅恐怖遊戲，玩家於場景裡面嘅活動性、或者可以將怪物設為隨機出現；如果想做求生類恐怖遊戲，就算你想好似《Outlast》咁樣只能走佬、無得攻擊或者防備，都可以做一個 HP 值＋San 值系統，咁玩家於遊戲裡面可以收集嘅「可使用 Item」又會多左，令到遊戲性豐富起來。

謎題太簡單

可惜《The Medium》而家唔算係一隻遊戲，更似係工作室握住玩家手仔，一步一步去實踐佢地寫出黎嘅故事；呢個故事佢地寫得嘔心瀝血，所以連點樣遊玩，都要由佢地去控制玩家。如此一來，《The Medium》嘅遊玩感受自然是不暢快的。

總括而言，《The Medium》場景雖靚，但係欠缺互動性；劇本重點雖多，但係欠缺深度；無 Bug 少 Error，但係遊玩性不足。

當然，以一間細廠出品黎講，《The Medium》處處都顯露住工作室嘅心思。佢地好用心去做呢隻遊戲，呢一點，玩過《The Medium》嘅朋友相信都會認同。作為玩家，當然希望「有心做遊戲嘅工作室」可以於未來越做越好。工作室聽講已經著手準備緊下一隻恐怖遊戲，唔知吸收咗今次經驗，到時又會有幾多進步呢？

編輯部評分：6／10

《The Medium》已於 PC 及 Xbox Series X｜S 平台上面推出，對應 Xbox Game Pass。