Google Stadia 呢個遊戲串流服務初公佈時的確引起話題，喺 2019 年頭 Google 仲成立埋「Stadia Games and Entertainment」自家遊戲工作室，明顯不滿足於只有第三方遊戲，想要製作自家出品，不過勢估唔到短短 2 年呢個計劃正式玩完，因為日前 Google 正式宣佈關閉「Stadia Games and Entertainment」，亦即係等同放棄研發自家遊戲。

Google 副總裁及 Stadia 總經理 Phil Harrison 喺聲明入面直接講明原因：「由頭開始創作一流嘅遊戲需要用大量嘅金錢同時間投資，而且呢個成本仲會持續增長。所以黎緊會將重點轉為向業務合作夥伴提供 Google Stadia 嘅成熟技術，以加深合作關係。喺未來佢地仍然會致力於雲端遊戲，目標係成為遊戲開發商及玩家中最好嘅橋樑。

今次關閉 Stadia 工作室對 Google 喺遊戲界嘅發展係一個嚴重嘅打擊，本身 Google Stadia 除咗係遊戲串流服務之外，Google 願意投資自家遊戲出品係最初 Stadia 帶俾玩家嘅願景之一，特別係佢地請咗曾任 EA 及 Ubisoft 長期製作人兼執行長 Jade Raymond 領軍，可見其決心。關閉工作室實際上令啱啱起步嘅 Google Stadia 降級，可以玩嘅遊戲喺其他主機都玩到，但就唔似 Microsoft、Sony 及任天堂有獨家作品，呢點亦係各公司吸引玩家嘅主要賣點。

事實上而家開發 3A 大作真係「燒錢」，相比其他產業，遊戲開發絕對係低回報高風險嘅選擇，特別係最近《Cyberpunk 2077》負面消息不斷，令到 CDPR 股價大跌，Google 決定取消開發遊戲想法亦都唔難理解，只係可惜玩家遊玩 3A 大作又少一個選擇。