人類多年黎一直有向未知地區探險，而海底探險就備受大家喜愛，電影亦都經常有類似嘅題材，因為普通人無乜機會接觸海底，所以特別有神秘感。黎緊就有一隻以海底洞穴探險為題材嘅遊戲《Hidden Deep》，四人團隊齊齊合作挑戰，神秘恐怖海底深淵！

《Hidden Deep》由 Cogwheel Software 開發，係一款驚慄橫向動作遊戲，最大支援四人連線合作遊玩。遊戲故事發生喺海底 1.6 公里嘅神秘洞穴，第一隊研究人員去調查時發現未知生物同異常現象，但之後研究人員突然失去聯絡。為咗搜尋佢地，玩家組成第二隊研究隊，帶領隊員前往救援並查明到底地方發生咩事。

遊戲特式在於玩家只係一個普通嘅研究人員，無特別能力亦無超強體術，有嘅只係各種現實存在嘅設備，即係抓鉤、掃描器、無人機等等。由於我地所前往嘅地方係完全未知嘅領域，所以我地要先利用掃描器進行地型勘探，甚只可以利用大型機械進行地形改造，當然仲有未知嘅生物同各種機關陷阱等緊你。

遊戲之後會提供四人合作遊玩，現階段只有單人模式，所以玩家要對隊友下達命令又或者操作該角色進行任務。有趣嘅係你以為隊友喺身邊等於安全，事實可能啱啱相反。喺影片入面我地見到神秘生物會寄生於人體上，輕則手臂被寄生，重則整個身體被佔據，變成人類外貌嘅怪物，伺機「陰」你一鑊。呢種玩法會令你操作隊中一人時諗其他三人做緊乜，係咪已經被寄生，透過未知嘅恐懼增加緊張恐怖嘅體驗。

《Hidden Deep》現時遊戲提供超過 50 個關卡主線劇情、故事及生存兩種遊戲模式，預計於 2021 年發售，對應平台為 PC Steam，支援繁體中文。