舊年隻《Last of Us Part II》（政治正確 2）評價麻麻，但係遊戲入面所描繪嘅末日世界的確有獨特嘅魅力，黎緊就有一隻不論人設、場景都同佢極似嘅遊戲《Potentia》推出，想玩末日求生遊戲嘅朋友留意啦。

《Potentia》由獨立制作團隊 Wily Pumpkin 開發，屬於生存動作遊戲，採用第三身視點。遊戲中玩家將扮演 Victor，身處一個剛剛結束冷戰嘅地方，當大家正在大肆慶祝時突然被不明能量所襲擊，整個城市嘅人突然失蹤晒，除咗敵人，然後 Victor 就梗係邊殺敵邊搵出真相啦。

左邊係本作主角 Victor，右邊係喬爾夫球

戰鬥部份同《Last of Us Part II》差唔多，都係近戰格鬥+遠距離射擊，但因為敵人警覺性超高嘅關係，所以都係鼓勵玩家潛行擊殺或者遠距離用弓箭殺敵，不過暫時未知後面會唔會有感染者。另外因為彈藥數量少嘅關係，玩家需要係地圖四處探索尋找資源，隨遊戲推進仲會得到夜視鏡、無人機等道具協助生存殺敵。而喺《Potentia》入面玩家有探索輔助功能，主要道具都會有明確指示，節省唔少時間。

場景美術極有《Last of Us Part II》味道

推動重物解謎玩法熟口熟面

《Potentia》預計於 2 月 12 日推出，對應平台為 PC Steam，現正提供免費 Demo 試玩。