由 Live Wire 及 Adglobe 開發，充滿住濃厚黑暗風格嘅類惡魔城《Ender Lilies: Quietus of the Knights》日前正式展開搶先體驗，喺短短幾日已經得到「極度好評」評價，而且美術、操控性、劇本等都得到玩家一致讚好，絕對係值得一玩之作。

《Ender Lilies: Quietus of the Knights》係一款黑色幻想風格 2D 橫向卷軸動作 RPG。遊戲講述喺一個叫「盡頭之國」嘅地方，降下「死亡之雨」令到所有生物都變成狂暴活屍「穢者」。面對有如詛咒一樣，永不停歇嘅雨，王國束手無策並迎向滅亡，直至主角「莉莉」喺教堂醒來，為救贖世界拉開序幕。

遊戲玩法同一般橫向動作遊戲差唔多，基本動作都係迴避、衝刺，但係莉莉本身係弱質少女，所以係並無攻擊動作。要攻擊敵人就要靠召喚出黎嘅騎士，會以類似「JoJo 替身」嘅方式跟隨莉莉並作出攻擊。喺冒險過程會遇到強大嘅穢者（即係 Boss），對決時要思考點避開佢地嘅招式，當擊敗佢地就可以將之收服並使用相關嘅劍、弓、魔法等共 26 種技能。另外裝備遺物亦可以得到各種效果，玩家要根據自己遊戲風格選擇合適嘅裝備。

戰鬥以外，遊戲提供廣大嘅地圖及多種謎題，玩家可以由選擇由邊區開始探索，並且會因應玩家選擇而影響故事結局。暫時搶先體驗提供莊嚴王城、浸水森林、被污染地下禁忌區域呢三個地圖，預計完整版會有總數八個區域。

《Ender Lilies: Quietus of the Knights》PC Steam 版本正進行搶先體驗，Xbox Series X|S、PS4（PS5 可向下兼容）、Nintendo Switch 及 PC 正式版預計於 2021 年第二季推出。

更新：PC 正式版及 Nintendo Switch 版已於 2021 年 6 月 22 日推出，PlayStaion 4、 PlayStaion 5 版本則預計於 7 月 6 日推出。