一蘭拉麵咁出名我諗都唔洗點介紹，但係有無諗過佢會出 Game？由 Tricol 開發嘅《カウンターファイト 一蘭》（Counter Fight ICHIRAN）喺早幾日已經正式發售，用 VR 體驗做一蘭店員嘅感覺。

《カウンターファイト 一蘭》（Counter Fight ICHIRAN）係一款 VR 遊戲，喺遊戲入面玩家將扮演一蘭拉麵店店員，工作內容包括煮麵、送餐。煮食嘅玩法就類似一般煮食遊戲，依次序落湯、淥麵、加配料、調教辣度等等。煮好麵之後就要送餐到客人嘅「味集中座位」度（即係「隔開兩側視線，營造出不用在意他人眼光也可以輕鬆享用美味拉麵的獨立空間」），而送餐時間就要跟返一蘭規定，即係拉麵完成後要喺 15 秒內送到客人度。

另外遊戲入面盡量重現返一蘭拉麵嘅格局，不但有「味集中座位」，店入面嘅音樂、服務鈴聲等等都有還原，不過就唔見有斟水呢個項目，話晒某位「日本達人」講過有無限冰水就係好嘅拉麵店嘛。

《カウンターファイト 一蘭》（Counter Fight ICHIRAN）已經上市，對應平台為 PC，需使用 Oculus Quest 或 Oculus Quest 2 。