以往舊世代主機因為無現時咁強機能，所以製作團隊往往會將心思放喺遊戲玩法、創意、豐富度等地方，亦因為咁所以當年遊戲界可以話係百花齊放。當年就有一款作品《Magic Castle》出現多種創新元素，令人充滿期待，可惜呢隻「夢幻作品」當年並未完成。估唔到事隔廿年，當年製作團隊其中一人將此作品完成，並提供免費下載，可以話一圓當年 Fans 嘅願望。

《Magic Castle》係一款動作角色扮演遊戲，對應平台為 PS1。喺今年年頭製作團隊主要成員松並桂一及 PIROWO 接受訪問時透露，遊戲最初係 1997 年以「Net Yaroze」進行開發（Sony 專為開發人員而設嘅基本版開發工具），用八個月時間進行製作後，以 VHS 格式製作影片並向包括 Sony 在內嘅七間發行商進行推銷，當時 Sony 仲好欣賞呢條影片添。不過之後 Sony 對《Magic Castle》並不十分感興趣，希望該團隊進行其他遊戲開發，所以遊戲並未能推出市面。

《Magic Castle》雖然係廿年前嘅作品，但其實已經有唔少現代遊戲嘅元素，例如可自定使用界面、音樂等等，又有四人協力同遊，當中各角色技能特性各異，加上鏡頭會因應距離放大縮小、動態音樂等等，如果當年成功推出的話肯定會成為一代經典。慶幸製作團隊主要成員 PIROWO 最近搵到喺「Net Yaroze」上《Magic Castle》嘅源代碼，於是決定將佢完成並向公眾發佈，等咗多年嘅玩家終於可以玩到了。

《Magic Castle》可到此下載，由於係 PS 初代遊戲，玩家需要用模擬器或燒返隻碟放落 PS1 運行。