Roguelike 動作遊戲越嚟越多，唔係斬就係射，係咪開始覺得有啲悶？以下呢隻由獨立遊戲製作公司 PolyCrunch 製作嘅《Pyramid Plunge》唔只有新意，仲啱晒情侶使用！

《Pyramid Plunge》所講嘅故事好簡單明確，就係要令呢對騎呢情侶 Giorgio 同 Felicie ，限時之內要逃離金字塔。

遊戲版圖當然係隨機生成，時限過後，金字塔會水浸而令逃脫難度增加，最終當然要打個 Boss 先走得甩啦。玩家主要嘅攻擊手段就係「踩」同「掟」，最有趣係你可以將另一半「掟」出去當投擲道具使用。不過兩個角色各自有血量計，即係你唔小心掟左另一半去怪物旁邊，佢就會因無反擊能力而被怪打死，咁就返到起點重新開始。

《Pyramid Plunge》仲有個雙人 PvP 對戰模式，最多錢逃出金字塔嘅就係勝利者。

《Pyramid Plunge》嘅試玩版已經喺 Steam 平台免費下載，完整版預計會喺 2021 年第一季上架，輕鬆得意絕對可以一試。