作為貓奴，主子打爛屋企啲野係常事（好在屋企果兩隻都算乖），作為奴才只能夠默默承受。即將推出嘅《Fisti-Fluffs》就係一款俾玩家體驗做貓貓嘅遊戲，可以同其他貓打交仲有最重要嘅野 – 周圍打爛野，愛貓嘅你又點可以錯過。

《Fisti-Fluffs》由 Playfellow Studio 開發，係一款貓貓模擬大亂鬥遊戲，玩家將扮演貓貓與其他貓打交，並且係激烈嘅戰鬥中同四處破壞。遊戲特別之處係大量場景可供破壞，而場景中所有物品皆可以拎黎當武器投擲，比起單純用貓爪攻擊破壞力高得多，如果有玩過 Capcom 名作《Power Stone》嘅朋友相信唔會陌生。

遊戲將提供五種遊戲模式，有專係玩 PvP 的亦有多人合作模式，當然亦可以單人遊玩，不過官方就建議同朋友一齊玩會開心啲。另外玩家仲可以幫貓貓著衫或者戴帽去自定外觀，唔想打交的話都有個影相 Mode 俾你影貓，以小品遊戲黎講算交足功課。

《Fisti-Fluffs》預計於 2021 年初發售，對應平台為 Nintendo Switch 及 PC Steam，現時 Steam 版已提供 Demo 下載。