影呢樣野非常之微妙，會隨光線、距離產生變化，但又唔會離開本體，種種特性其實好適合遊戲使用，用影作為解謎手段喺遊戲中亦頗為常見。最近就有一隻以影為主題，利用光影間嘅變化製做謎題，難度有返咁上下，想燒腦嘅朋友唔好錯過。

《Shady Part of Me》由 Douze Dixièmes 製作，係一款獨立製作單人解謎遊戲。故事講述一位細路女被困於黑暗嘅夢境中，佢同佢嘅影子必需互相幫忙，尋找脫離幻境開嘅道路。遊戲特色係玩家需要喺女孩同影子間不停切換，藉由二者間嘅特性解開謎題。

整個遊戲都係使用光影變化，所以角色亦有自己嘅特性，女孩怕光（見光死）；影子唔怕光但係掂到荊棘就會消失，藉由角色間嘅轉換場景亦會變為 2D（影子 Mode）同 3D（女孩 Mode）。因為場景頻繁轉換，玩家要計算埋角色行進嘅路徑，例如本身喺牆上移動緊，轉彎之後可能就會落咗地，加上光與物理間嘅距離會改變影子大小嘅關係，變化真係幾大。

遊戲操控方式簡單，主要都係要玩家用腦解謎，而謎題多數都係光影投射距離、物體移動順序、機關時間差等等。另外遊戲係並無「死亡」呢樣野，如果失敗可以用「倒帶」功能返去之前嘅時間點重新黎過，好有「天能」味。

《Shady Part of Me》已在 12 月 11 日發售，對應平台為 Xbox One / PS4 / Nintendo Switch / PC Steam & Epic Game Store。