《今際之國的有栖》呢個名唔係 Netflix 12 月 10 號上架，睇見個影片介紹先知原來係套漫畫真人化嘅日劇。咁老老實實，日劇從來都唔係我杯茶，睇開歐美劇嘅我，你問山崎賢人同土屋太鳳係邊個、咩樣、拍過咩戲，我完全冇印像，丁點都唔識。

完全一張白紙咁開呢套新劇嚟睇，毫無期望之下唔只驚喜十足，即刻追返漫畫版對比之下一句講晒：

好X好睇！

為免劇透以及減弱你觀賞時嘅刺激感，我會形容佢係《Saw 恐懼鬥室》溝《The Hunger Games 飢餓遊戲》嘅混合體，而且當中嘅遊戲鬥智鬥力，血腥暴力感十足，完全滿足官能刺激。

主角同兩個朋友去完個廁所出返嚟，成個東京無晒人，同主角一樣留喺街頭嘅人，被迫參加死亡遊戲。成功生存就會得到VISA，當VISA用盡就會即時被雷射槍射穿死，《今際之國的有栖》嘅故事就係咁正式開始！

就算你係睇過漫畫版，對故事已經有一定印象都唔緊要。真人版第一個「♣3」遊戲係同漫畫版完全唔一樣，照顧埋睇過原著觀眾嘅追求嘅新鮮感。Netflix 真人版《今際之國的有栖》只係得 8 集，每集唔夠一個鐘，劇情濃縮得恰到好處，極爽快節奏直頭令你追住睇唔停。第一季已經囊括漫畫版第一階段嘅主要劇情，有始有終唔會有種「到喉唔到肺」嘅感受。

第一季呢 8 集睇完非常收貨，兼且高度推薦比一班對日劇有種抗拒嘅朋友，並且期待第二季所帶嚟嘅驚喜。