今年年尾由十月開始，每個月總有一隻 Ubisoft 大作推出，先有《Watch Dogs: Legion》，然後有《Assassin’s Creed Valhalla》，再黎就到今個月推出嘅《芬尼克斯傳說》（Immortals Fenyx Rising）。喺之前嘅媒體試玩，已經感受到呢個新 IP 非一般地好玩，實際推出後更無令人失望，係今年年尾非常值得一玩嘅作品。
《芬尼克斯傳說》係一款動作角色扮演遊戲，採用第三身視點，開放世界。遊戲背景採用希臘神話，玩家扮演有翼半神芬尼克斯，為咗拯救希臘眾神挺身對抗怪物之起源「堤豐」。開場時芬尼克斯同行軍隊遇難死淨佢一個，喺路上四處收集神器並慢慢發現自己嘅使命。
「堤豐」勁似《Ring fit》入面隻「墮拉攻」
喺本作入面，故事敘述方式由頭到尾都係由普羅米修斯向宙斯用講故仔嘅方式表達，當中就連道句解說、過場都係由兩位神用搞笑嘅方式演譯，呢種方式賦予遊戲輕鬆愉快嘅色彩，而且喺整個探索旅程中聽住佢地互相吐糟都真係幾過癮。
另外本作雖然係講緊希臘神話，但係製作團隊用有趣嘅旁白去敘述每位神祇嘅個性同故事，以簡潔有趣方式帶入劇情，即使對希臘神話無乜認識都非常容易理解。當然，如果玩家本身已經對希臘神話有認識，就更加體會到兩位神喺敘述故事細節中嘅「梗」。
呢度其實係講緊咸濕笑話……
遊戲玩法方面，Ubisoft 自己都承認作品係向《薩爾達傳說 曠野之息》致敬，不過我就覺得係「啟蒙」比較多。喺主線架構、爬野扣體力系統、碌波波解謎、重力物理效果等等都有濃厚嘅「薩爾達」味，但係喺各種操作同延伸系統上有作出唔少改良或者係新元素，特別係將戰鬥系統作出大幅強化，呢啲種種嘅改變令《芬尼克斯傳說》玩起上黎有自己嘅味道。
滑翔可以進行加速，唔洗慢慢飄
戰鬥系統基本動作分為輕、重攻擊、四個神威技能、閃避、跳躍同埋盾反。輕攻擊動作快，主要用作連招用，重攻擊則有破防效果及更快地累積昏厥值，再配合角色成長後學到嘅其他連携攻擊，就會衍生出各種玩法，例如集中敵人用範圍攻擊、地面連一大堆招再炒佢上天玩 Air Combo，又或者離遠用箭屈到 2046 都得。
連招 Hit 數越多，攻擊力越高，圖中單發攻擊傷害破五百
唔想正正經經打，玩家可以喺附近搵下有無大型物件，對敵人投擲可造成大傷害及累積大量昏厥值
連招以外，閃避同盾反喺《芬尼克斯傳說》入面可以話係非常關鍵嘅技巧。只要喺敵人攻擊就打中時閃避就會變成「完美閃避」，將會有大約 1 – 2 秒時間停頓，呢個時候可以輕鬆入一套連技。至於盾反亦都係喺敵人攻擊就打中時反擊，成功的話會架開敵人攻擊並製造硬直（遠程攻擊則變為反射），同樣可於呢個時候入一套連技，只要掌握以上技巧打王可以話極簡單。當然對不擅長動作遊戲嘅朋友黎講，以上技巧都唔係咁易掌握，其實係遊戲入面藥水 CD 時間非常短，真係唔夠打都可以玩「藥水無雙」。
盾反打擊感做得非常之好，成功反擊係極爽的
唔少裝備都有針對「完美閃避」、「完美反擊」強化
推薦技能：「完美反擊」後強攻擊，製造衝擊波推跌一定範圍內敵人，解圍超好用
喺本作入面，角色並無等級設定，主要係靠探索得到嘅寶石強化武器及防具；花草果實提升藥水能力；仙饈、宙斯閃電提升血量、精力上限；卡戎的錢幣學習技能。個人覺得呢個設計頗適合本作，因為《芬尼克斯傳說》整體感覺係輕鬆有趣，如果要農 LV 農裝就未免令人感覺乏味，用收集品強化反而令人更有動力以尋寶為先。
遊戲中整個地圖都充滿住各種謎題，而且難度有返咁上下，不過比起《薩爾達傳說 曠野之息》，謎題難度好多時更偏向操作性多於思考，而且埋藏謎題嘅機關裝置成日都擺得好難搵，呢部份就比較扣分。另外地圖上雖然有為數不少嘅大型怪物，但係打倒佢地後打到嘅獎勵完全不成正比，令人缺乏挑戰佢哋嘅意慾，此為另一扣分位。
謎題難度好多時更偏向操作性多於思考
即使係呢類有名傳奇怪，打死佢獎勵都唔算豐厚
最後想講下喺現時版本存在住唔少奇怪嘅問題，例如當玩家喺「拼圖解謎」時，視點會不停切換至奇怪位置，令人極難操控；最頻繁使用嘅輕攻擊按鍵配置於「R1」位置，如果係使用 Switch 的話會玩到燥底；偶然會自動幫你二段跳等等，希望黎緊會有 Patch 改善呢啲問題。
更新後自動轉視點問題已大幅改善
總結：
《芬尼克斯傳說》雖然喺唔少地方都見到《薩爾達傳說 曠野之息》影子，但係佢地加入各種元素令佢成為一隻有自己風格嘅作品，如果諗住當佢係《薩爾達》咁玩，反而會有落差，因為實際上的確係二款唔同嘅作品黎。最初玩果陣因為美術風格太過過「美式」，唔係好投入到，但係將語音轉做日文之後，感覺出奇地 Match，再加上搞笑輕鬆風格嘅對白，真係越玩越迷！
不過呢隻遊戲最勁果樣都唔係上述優點，而係出奇地少 Bug，玩咁耐都只係幫我熄咗二次機，以 Ubisoft 黎講真係難能可貴。整體黎講，我哋係幾推薦《芬尼克斯傳說》呢款遊戲，特別係鍾意探索開放世界同對希臘神話故事有興趣嘅玩家，一定唔會令你失望。
推薦度：8.5 / 10 （操控性有待強化，謎題可更多元化）
回帶相關文章：
【遊戲攻略】《Immortals Fenyx Rising 芬尼克斯傳說》初期拿取大量金幣 全大七弦琴樂譜分享
【遊戲攻略】《Immortals Fenyx Rising 芬尼克斯傳說》初期入手史詩級坐騎「獨角獸」地點分享
VJGamer總編，細細個已經蒲機舖，機齡甚深，熱愛電玩文化。