有冇發覺呢排始似冇乜恐怖 Game 咁？對上介紹嗰隻 4 人捉鬼嘅《Phasmophobia》，搞搞下好似人多過鬼，氣氛變得麻麻地。今次呢隻由獨立遊戲團隊 Broken Arrow Games 開發，第一身驚慄生存遊戲《Don’t Be Afraid》，氣氛同無力感充足，而且都的確嚇得下人！

《Don’t Be Afraid》當中，玩家所扮演嘅角色係一個只係一個 11 歲嘅小朋友，不幸地被一個戴面具叫 Mr. Franklin 嘅連環兒童殺手囚禁喺密室之中。而你作為一個毫無還擊之力嘅細路，就只能夠獨力面對呢個連成年人都搞唔掂嘅困境。

場景氣氛做得好有 Feel 之餘，喺密室中總有種比人監視住嘅感覺。究竟係心理作用定係仲有其他人喺度？ Mr. Franklin 點解要捉啲小朋友返去折磨？背後隱藏住咩不可告人嘅秘密？咁就要留比玩家自行探索啦！

《Don’t Be Afraid》12 月 18 日即將喺 Steam 平台架，而佢嘅前傳《Don’t Be Afraid – The First Toy》已喺 Steam 度率先免費比玩家們感受下個氣氛以及無助感，大家玩完覺得有 Feel 先再決定比唔比錢都唔遲。