【遊戲感想】支線小遊戲更勝劇情《Assassin’s Creed Valhalla》不過不失的刺客「外傳」

由上次試玩後，一改我對《刺客教條：維京紀元（Assassin’s Creed Valhalla）》（下稱《維京》）嘅觀感之後，我抱住一個非常期待嘅感受開 Game ，最終係以興奮嘅感覺完成主線及部份支線劇情，但係冷靜返落嚟之後，我又有另一番見解。

先讚一讚隻 Game 嘅開場，自上集《AC：奧德賽》現實情節中，因聖矛上搵到兩組 DNA，所以玩家可以選擇角色性別；《維京》一開始就話 Animus 收到兩組 DNA 訊號搞到壞機程式故障，你唔揀性別就唔可以繼續落去。呢啲首尾呼應（自嘲？），你估間間廠做得到咩！

《刺客》系列向來都唔係以靚畫面作為賣點，但係，遊戲版圖如此龐大嘅情況之下，不論雪山、草地、廢墟、城鎮等大環境，畫面呈現算係做得不過不失了；而且喺一啲小細節上，例如角色身上裝備嘅材質、光影反射、皮毛嘅層次感等等，都做得非常細緻。遊戲當中好多時候玩家與 NPC 互動同對答，當中啲近鏡畫面就可以清楚易見（下面片段可見）。

我曾經於早前嘅試玩文章裡面同大家提及，今集嘅操控同系統，同以往嘅《刺客》有唔少分別，感覺比較傾向市面上普遍嘅 ARPG Game 。

《維京》雖然有大量揸船時間，不過工作室今次就放棄海戰玩法，玩家嘅長船只係一件單純嘅交通工具。因此，戰鬥重點就落喺「暗殺」同「近戰」兩個部份。

如果主將「暗殺」，玩家就要多少少耐性，事關主角初期只係一個普通戰士，就算得到袖劍，都只係似一件普通武裝。但係，隨住劇情發展到英格蘭之後，好快你就會學習到刺客嘅基本能力，例如「暗殺」及「信仰之躍」等等，成個《刺客》系列嘅感覺就完完全全返晒嚟。

至於越級挑戰強敵則有返「一擊暗殺」呢個設定，配合 QTE 系統以及其他暗殺技能，整體感覺爽快流暢而且刺激。

不過，近戰方面就略嫌令人失望。武器種類的確唔少，但係玩家需要用上好一段時間，先會買到、或者搵到其他武器種類；加上初始武器已經有返咁上下實力，懶起上嚟，真係可以一把斧頭打到尾。

今集敵人加左「弱點」呢個新設定，玩家可以先用箭射擊敵人身上弱點，令敵人暈倒後作出「暈眩攻擊」；不過，假如玩家「射擊系苦手」自然不在話下，「弱點」亦都唔係經常會出現，彈出彈入，有時有有時無，所以實用度唔算好高，我倒不如好好地「擋反」令佢氣絕之後進行「暈眩攻擊」，咁樣玩反而仲爽脆。

《維京》以英格蘭七國時代（Heptarchy）真實歷史作為故事主軸，講述主角埃沃爾（Eivor）同自己兄弟兼氏族主席格德（Sigurd），不認同第一位挪威國王金髮哈拉爾德（Harald Hårfagre）統治，帶住族人離開挪威，於英格蘭尋找新居所，並無意中得到袖劍成為刺客嘅故事。

遊戲劇情中有大量選項需要玩家作出抉擇，不過，當中實際影響最終結局發展嘅選項，其實只係 5～6 個左右，而且有部份劇情選項，未有如官方所講可以做到「不戰而屈人之兵」，好多時談判去到最後，其實都係難免一戰……。

簡單黎講，選項揀得對與錯都好，對玩家黎講，可能只係少一件武裝、或者有少少資源上嘅落差，於主線並無實質影響，但係可能會有一啲新嘅支線發展。

例如劇情中，你明明殺左 A 君並作出侮辱，並於匯報時作出不實回答。其他相關角色未必會即時對你作出指控，但可能幾個章節後，其他角色會因你嘅不實回答而搵你算帳，都算係有另一番樂趣嘅。

《AC：起源》《AC：奧德賽》到今集《維京》合稱「刺客前傳三部曲」，今集係三部曲嘅最後一集，不過玩家就算完成主線劇情＋完全征服英格蘭各地，玩家去到 End Game 一刻，都只會知道現代劇情線裡面，將會有另一個大危機發生；然而主角埃沃爾到底點樣影響「無形者」變成「刺客」，呢一段故事嘅說明始終未有表示，到底係篇幅問題 Cover 唔到，抑或 Ubisoft 另有打算諗住拖留到下集先講，咁我地就不得而知了。

成個故事主軸係講對抗個人野心同虛榮，但係關《刺客》咩事？

主線劇情可能令《刺客》系列 Fans 未盡人意，不過相對地，支線以及收集部份就精彩得多。遊戲將「北歐神話情節」獨立成為一個小章節，而每個小國內嘅支線劇情，都會於當中加入各種民間傳說同野史。至於尋寶｜收集要素方面，因為「渡鴉」以及「奧丁視覺」嘅能力削弱，加上場景中不同機關嘅配合而變得更加有趣，一洗近幾代《刺客》「無腦式收集」嘅頹況。