備受玩家期待嘅《Cyberpunk 2077》將於 2020 年 12 月 10 日正式推出，CD Projekt Red CEO Adam Kiciński 早前在公司第三季度股東大會上面就表示，於遊戲正式推出之前，有關遊戲嘅多人線上模式以及 DLC 相關資料將會保持神祕。

公司原定將以上資料在遊戲上架之時同步公佈，不過有鑑於遊戲一再延期，而內容亦有所增多減少，CDPR 而家會傾向睇下玩家於遊玩正式版遊戲後嘅反應，再決定包括 Season Pass 在內嘅下一步方向。

不過有關遊戲嘅 DLC 份量，其實亦有跡可尋。早在 2018 年時，CDPR 已表示《Cyberpunk 2077》將會以《The Witcher 3》模式作為藍本，會在遊戲推出之後提供大量免費及付費 DLC，包括武器、支線、道具等等各種多元化物品。

《The Witcher 3》推出時，CDPR 於三個月內連續地推出了 16 個免費 DLC，而工作室表示《Cyberpunk 2077》有嘅 DLC 只會更多、不會少於《The Witcher 3》；所以大家對於遊戲嘅持續遊玩性以及豐富程度，絕對可以抱持期待。

至於多人線上合作方面，佢地就表示目前想專心做好單人遊戲嘅支援，多人模式係一個大企劃，佢地預計至少 2021 年 3 月份時先會有更多公佈，希望玩家耐心等候。

《Cyberpunk 2077》將於 12 月 10 日推出，對應平台為 PS4｜5、Xbox One｜Series X｜S、PC、Stadia。