【遊戲新聞】本年度最後一隻備受期待大作《Cyberpunk 2077》奇洛李維斯角色戲份多可操作

相信對於唔少 Gamer 黎講，即將（終於）於 2020 年 12 月 10 日推出嘅 CD Projekt Red 遊戲《Cyberpunk 2077》絕對係今年最備受期待嘅作品。雖然作品一再延期，但係 CDR 出品幾乎等同係信心保證，我地都肯定送到玩家手上嘅遊戲會係令人驚艷嘅作品。

自從工作室公佈奇洛李維斯（Keanu Reeves）將會於遊戲中飾演一角之後，玩家期待更甚，雖然佢於遊戲中飾演嘅 Johnny Silverhand 並非主角，不過相比起主角嘅故事，唔少玩家更想知道嘅係 Johnny Silverhand 呢個角色到底於《Cyberpunk 2077》到底有何發展。

隨住遊戲公佈日越黎越近，有關消息亦都更為明朗；Johnny Silverhand 唔單止佔有極重戲份，仲係一個 Playable 可操作角色。數日前工作室於 Youtube 上面公開左一段影片，裡面收錄左 Keanu 進行遊戲工作時嘅感想。

Keanu 表示，自己雖然曾經做過配音工作，亦於電影作品例如《Matrix（廿二世紀殺人網絡）》系列裡面做過唔少次嘅 Motion Capture；不過，佢都可以坦言《Cyberpunk 2077》係佢遇過最具挑戰性及有趣嘅工作之一。因為遊戲裡面嘅故事並唔係單一發展，面對一啲對話｜選項，玩家唔同嘅選擇會導致各異嘅結果，所以佢面對同一件事，需要演繹三至四種反應，呢度非常考驗佢嘅演技。