由 Nolla Games 開發嘅《Noita》，喺舊年 9 月喺 Steam 已經做搶先體驗，到今年 10 月 16 日正式發售，現時已經得到萬六條評價兼得到「壓倒性好評」評價，足證遊戲質素。遊戲強調極強嘅物理互動，每個像素都擁有物理效果，喺實際意義上改變 Rouge-like 遊戲嘅玩法。

《Noita》係一款 Rouge-like 類動作迷宮探索遊戲，採用像素風格。製作團隊係好早期已經講過遊戲嘅特式係「遊戲中每個像素都有物理模擬效果」，事實證明佢地無吹水。遊戲中嘅物理效果並唔係物件互相碰撞、重力等，而係畫面中所有野都有互動關係。首先遊戲入面大部份野都可以破壞，而破壞物品之後仲會有各種連鎖反應，簡單如油、木頭遇火燃燒；冰遇火會融化做水及水蒸氣；毒液、腐蝕液體遇高溫會蒸發變成粉塵，遇火會引起塵爆；水同金屬會導電等等，物理元素極之豐富。

因為玩家可以破壞大部份物件關係，只要遇敵戰鬥就一定會對環境做成各種破壞，然後地圖上就會充斥各種物理元素，所以絕大部份時間都係自己整死自己，基本上都係諗點先唔會整死自己多過諗點打怪。有趣嘅係，因為玩家所控制嘅角色係一位巫師，所以隨探索會得到各式各樣嘅法杖，每把法杖施法速度、魔力最大值、容量等數值都唔同，技能亦五花八門，多角度噴火、大範圍爆炸想點砌就點砌，但係有一個共通點就係武器越勁越易整死自己，喺武器同環境因素中搵到適合自己嘅平衡係本作一大樂趣。

玩《Noita》玩家狂死係一定的，但係每次死亡都會令玩家悟出新玩法，好多時做錯野引致大量連鎖反應整死自己，喺呢個過程中會學到物件間嘅相互關係，然後就會諗到新玩法，再配合各種技能，基本上玩極都勁有新鮮感，成功地賦予 Rouge-like 遊戲新生命。

《Noita》已經推出，對應平台為 PC Steam & GOG。