音樂節奏遊戲同動作遊戲大家唔會陌生，如果將二樣野溝埋又會點呢？喺十月尾果陣其實出咗隻將二樣野溝埋嘅遊戲《Mad Rat Dead》，不過撞正一堆大作同期推出，所以無乜人留意。自己就因為同時係音 Game 同動作 Game Fans，好耐之前已經留意呢隻遊戲，而且實際遊玩過後真心覺得要推薦俾大家。
《Mad Rat Dead》由充滿嘗試精神嘅日本一所開發，係一款音樂節奏橫向動作遊戲，由曾製作驚悚遊戲《夜迴》系列總監溝上侑所創作。故事主角「瘋狂小白鼠」其實係一隻實驗用鼠，可憐地於籠中終結一生。老鼠之神見佢咁可憐，於是賜予佢「最後一天的生命」，然後佢就踏上向人類復仇之路。老實講，齋睇呢段故事介紹我都覺得老土，但其實一路玩落去劇情頗為轉折，揭曉「老鼠之神」真正身份時亦頗驚喜，不過為免劇透所以唔會講太多劇情相關。
遊戲玩法方面，玩家要喺限時之內越過障礙都達終點。但操控方式就非常特別，就咁睇片可能會有啲「迷」。雖然基本動作同絕大部份橫向動作一樣，但喺《Mad Rat Dead》入面你無論做咩行動都要跟返音樂個「Beat」先有反應。例如跳躍呢個動作，喺一般動作遊戲都係撳下制就得，但喺《Mad Rat Dead》入面玩家要配合畫面下方所顯示嘅音樂節奏符號，睇準時間按下按鈕，角色先會有反應。如果無跟音樂節奏 Miss 左果拍的話，點撳角色都唔會跳。
要跟住下面啲拍子撳制先會做到動作
除咗跳躍之外，基本動作仲有衝刺、急降以及自轉儲力。衝刺即係令角色向前突進一段距離；急降可令處於空中嘅角色垂直急速下降；自轉儲力後用衝刺距離將大幅增加。不過自轉仲有一個用途，就係可以用黎邊數拍子邊緩速移動調較位置。整個遊戲就係跟住音樂節奏撳制，同時用以上各種技巧衝向終點。
自轉儲力可以用黎邊數拍子邊緩速移動調較位置，非常有用
音樂元素喺呢隻遊戲有極重要地位，普通難度下每個音樂節奏符號都係固定拍子，最多都係隨音樂轉變速度。不過轉成 Hard Mode 之後音樂節奏符號拍子不一，難度會變得極高。另外日本一搵返黎嘅音樂人分別係「a_hisa」、「Dyes Iwasaki」、「大山 曜」、「かめりあ」、「崎田浩一」、「川越好博」、「高須和也」呢七位，佢地嘅作品喺其他音 Game 都會見到，質素有一定保證（而且都真係幾好聽）。
即使係 Normal 難度，同一首歌都會隨音樂轉變速度
最後講一講 Boss 戰，遊戲中有幾場 Boss 戰打，Boss 攻擊方式唔算複雜，但係我方因為要跟返「Beat」做動作，同時又要諗點避敵人攻擊，所以係極之難玩的，特別係 Final Boss 時間極緊湊，好容易會因為唔夠時間死。唔好以為畫風係可愛路線就以為隻 Game 好低能，其實係勁有難度的。
Boss 戰緊張刺激，係幾好玩
總結：
《Mad Rat Dead》如果將動作同音樂兩部份獨立睇的話，無論邊樣都係弱智級數。但當兩者加埋一齊就唔係 1+1 咁簡單，要同時兼顧動作及音樂節奏兩者無想像中咁簡單，玩 Normal 已經勁有挑戰性。但因為遊戲無得揀 Easy 關係，好容易令技術無咁好嘅朋友玩到無癮，呢方面要改善一下。
得 Normal 同 Hard，如果有埋 Easy 照顧技術不佳玩家就更好
如果對遊戲界有認識，可能會聽過都市傳說「日本一名字由來」。因為日本一呢間公司太鍾意嘗試各種新類型遊戲，所以出品非常參次，搞到每年只有一隻遊戲可玩。《Mad Rat Dead》就絕對係今年嘅日本一，而且遠超可玩嘅質素，直頭係佳作。當然遊戲仲有唔少可改善嘅部份，例如劇情中段有啲拖戲、模式單一等等，希望續作會有所改善。
《Mad Rat Dead》已經推出，對應平台為 PS4 / Nintendo Switch。
編輯部評分：9／10 （遊戲性佳，音樂動聽）
VJGamer總編，細細個已經蒲機舖，機齡甚深，熱愛電玩文化。