典堂級科幻遊戲作品，《質量效應》（Mass Effect）系列一定佔一席位。之前外國論壇就有人吹過話元祖三部曲會出重製版，日前 BioWare 就親證呢個消息，宣佈三部曲重製合集《質量效應：傳奇版》（Mass Effect: Legendary Edition）將於明年推出，並且公開埋新作消息。

《質量效應》三部曲分別於 2007、2010 及 2012 年推出，係一款動作角色扮演遊戲，採用第三身視點。今次《質量效應：傳奇版》除咗基本單人內容之外，仲會跟晒所有 DLC、武器、裝甲等等，另外會對應 4K UHD 畫質及高 fps（未知去到幾多），並且會以第三集為藍本對遊戲進行各種強化。值得一提嘅係官方公告講到明係今次重製版係「not to remake or reimagine the original games」，亦即係唔會更改充滿爭議性嘅結局，個人黎講覺得有啲可惜。

除咗《質量效應：傳奇版》，BioWare 仲提到團隊整在為《質量效應》努力規劃中，並且已經處於開發階段，但由於現時只係開發初期，所以除咗一幅概念圖之外就並無更多資料，留待官方日後公佈。

《質量效應：傳奇版》（Mass Effect: Legendary Edition）預計於 2021 年春季上市，對應平台為 PS4 / PS5 / Xbox One / Xbox Series X|S / PC。