【硬件週邊】真正面向 GAMER 設計 Xbox Series X 超正新功能實試

新世代主機大戰即將開打，先一步推出市面嘅係微軟陣型嘅「Xbox Series X / S」。雖然上代主機失利，但係微軟重新審視市場策略，加入屈機級服務「Xbox Game Pass」（詳情），重新設計主機功能。我地喺幾日前已經拎到新機，實試新功能「Resume」 – 一個真正面向 Gamer 設計嘅功能。

已經嘆咗新機成個星期，好爽

唔講太多廢話，先講重點想同大家介紹嘅「Resume」功能。佢係一個類似電腦多工同步功能，玩家可以同時開啟二款遊戲，喺運行 A 遊戲中途可以隨時切換至 B 遊戲，中間無需關閉遊戲重新讀取。就咁睇可能未感覺到有咩咁正，但如果大家會玩啲多人 Co-op 嘅遊戲，就會明白呢個功能有咩咁正。舉個例，我地平時打多人遊戲時，打到咁上下總會有人話「等陣，急屎」、「要落街放狗，10 分鐘返」之類嘅情況，喺而家我地通常係收工散 Band 或者撳電話等，但有咗呢個功能之後，打緊《Monster Hunter World: Iceborne》就暫停隻 Game，再轉過去玩《勇者鬥惡龍XI S》推進度，到人齊果陣就可以轉返過去一齊屠龍，轉 Game 過程都係十零秒左右，完全唔會浪費時間！

除咗上面呢個功能，Xbox Series X 有超強力嘅 Upscale 功能。我地早前實機測試 Xbox 360 年代嘅《忍者外傳 2》，當年只有 720P 畫質嘅遊戲，黎到新世代主機得到強大 Upscale 效果，威力強大到你同我講係 Remaster 都信，講多無謂，大家自己睇下幅圖。

左邊係 Xbox Series X 截圖，右邊係 Xbox One S 截圖，一眼就睇到極大分別

Xbox One S 版本

Xbox Series X 版本

另外我地有向微軟求證，《忍者外傳2》呢種級數嘅 Upscale 係套用到所有舊版遊戲，同時佢地將會逐漸擴展至支援所有舊版遊戲（現時官網顯示支援最舊版遊戲只有數十款）。不過我地測試初代 Xbox 版遊戲如《Spike Out》、《Crazy Taxi 3》、《OutRun 2》、《Panzer Dragoon Orta》，只有最後一款可成功運行，官方解釋話要等正式發售後先會逐步搞掂。

2002 年出品嘅《Panzer Dragoon Orta》，竟然有呢個水平嘅 Upscale

除咗強化舊版遊戲外，同時會出現喺 Xbox One 同 Xbox Series X / S 嘅新遊戲亦會有相應版本嘅強化，例如微軟自家大作《Gear 5》，喺 XSX 除咗基本畫質提升，仲追加光影追蹤製作反射效果（Ray-Traced Reflections），表現比起舊機明顯高一截。另外第三廠遊戲如《Assassin’s Creed Valhalla》，喺 XSX 同樣有更佳嘅表現，遊戲會偵測玩家使用嘅主機再自動調整至相應嘅版本。最正嘅係不論閣下買邊個版本，都會自動有晒 XB1 同 XSX 二個版本，唔需要買二隻 Game。想睇現時完整嘅性能最佳化清單可以去返官網睇（會 Keep 住加遊戲落去）。